بعد قرار اعتزاله.. الفنان شريف إدريس: بحلم بكابوس إني بقتل عيالي وبقتل نفسي

أعلن الفنان شريف إدريس، اعتزاله العمل بالفن، من خلال منشور عبر حسابه بموقع "فيسبوك".
وقال شريف في المنشور: "بعد 35 سنة سعي وتعب وشقى في الوسط الفني، قررت الاعتزال والابتعاد تماما، وتغيير مسار حياتي، وأي حد عنده فرصة سفر ليا هكون شاكر ليه، وده طلبي الوحيد".
أوضح أنه اتخذ قرار الاعتزال، بعدما وصلت الأمور في الوسط الفني إلى ما أسماه ب"مرحلة عبثية"، مردفا: "وصلت إني بقيت بشوف بعض الزملاء بيشحتوا الشغل علني؛ لأن الشغل بقى متقسم على ناس معينة، فلو الأمور وصلت لكده أبعد أحسن".
وذكر أحد المواقف التي تعرض لها خلال عمله بالوسط الفني، قائلا: "هحكيلكم موقف حصل معايا من أسبوع.. اتصل بيا حد قالي عايزين حضرتك بكره عندك تصوير في مسلسل كذا بس هتدفع 10% للكاستينج دايريكتور، كان هيجيلي جلطة بعد ما قفلت المكالمة، ووافقت علشان محتاج اشتغل ومحتاج فلوس، مقدرتش استوعب الفكرة، بعد العمر ده مضطر أدفع علشان اشتغل، فاتصلت واعتذرت".
وأضاف: "طول عمري راضي الحمد لله، بس حقيقي وصلت لمرحلة اكتئاب وصلتني إني بقيت بنام أحلم بكابوس إني بقتل عيالي وبقتل نفسي، وصلت لمرحلة مادية إني مش قادر أصرف عليهم، عندي 3 أطفال، متخيلين حجم المسؤولية، وبقيت مديون لطوب الأرض".
وأكد: "لو اتعرض عليا بطولات بعد البوست ده هرفضها، لأن البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي، همسح أبلكيشن فيسبوك من تليفوني لأني هنزل أبيع تليفوني أصلا، فانا هاكون متاح أونلاين لحد بالليل، لو حد عنده فرصة شغل وسفر ليا ومش معاه رقمي ياريت يجيبه من اي حد".
وتابع: "أنا مش محتاج طبطبة من حد، أنا محتاج فرصة سفر وشغل تخليني أعيش ولادي حياة كريمة وبس، هاين عليا أرمي نفسي من البلكونة بعد ماوصلت إني اكتب البوست ده".
يذكر أن الفنان شريف ادريس بدأ مشواره الفني منذ أن كان طفلا وشارك في الكثير من الأعمال منها مسلسل "عائلة الأشتاذ شلش" و"رأفت الهجان" و"الجماعة2" ومسلسل" قصر النيل".