حفيدة إسماعيل ياسين: الفلوس والشهرة مملوش النقص عند محمد رمضان

علقت سمر ياسين، حفيدة الفنان الراحل إسماعيل ياسين، على مشهد من مسلسل موسى يظهر فيه ممثل يجسد دور جدها.
وكتبت عبر حسابها الشخصي بموقع فيسبوك، قائلة: "صحفيين كلمونا طالبين منا تعليق على مشهد في مسلسل اسمه موسى لمحمد رمضان، وعشان أنا الصراحة مبتفرجش على أعماله مكنتش فاهمة إيه سبب كل الدوشة دي وإلحاحهم على تعليق أسرة إسماعيل ياسين، هو أيه علاقة إسماعيل ياسين بمسلسل محمد رمضان أصلاً!".
وتابعت: "أحد الصحافيين صمم أنه يبعتلي المقطع وقالي كلمة ظهور سلبي وعشان برده أنا فاهمة إن طبع الصحافة المبالغة قولت نشوف ونحكم بنفسنا قبل أي تعليق.. والصراحة طلع عندهم شوية حق لأن دي مش أول مرة محمد رمضان يجيب سيرة إسماعيل ياسين، بس أنا مش بلوم عليه، واحد تصرفاته بتثبت مشاكل نفسية أهمها عدم الثقة بالنفس والنقص اللي واضح إن الشهرة والفلوس مملوش عنده الحتة دي".
وأضافت حفيدة إسماعيل ياسين، قائلة: "أنا بلوم على المخرج والمصور والمنتج اللي مفروض إنهم ينتموا للفن بس واضح انهم كمان ارزقية.. كمان بلوم على الولد اللي أدى الشخصية اللي صفحته على التيك توك كلها إعجاب وتقدير للفنان إسماعيل ياسين، دا حتى زار السويس اللي منها إسماعيل ياسين واتصور فيها، بس واضح إنه استغله للوصول للشهرة فقط لأنه لما جتله الفرصة للظهور في مسلسل؛ وافق على تقديم مثله الأعلى بشكل غير لائق بس ليه هو مش لإسماعيل ياسين، لأن ببساطة سيظل إسماعيل ياسين أيقونة الكوميديا في مصر والوطن العربي، الوحيد صاحب أعمال تُسمى باسمه، ستظل سيرته الحميدة التي لم تمت حتى بعد 49 سنة من وفاته رغم كل من يحاول الإساءة له أو لتاريخه الفني".