بعد انتشار صور فرح لعروس حامل.. الزوج: الشهرة حلوة ونفسنا نبقى مشاهير

تداول رواد موقع التواصل الاجتماعي "فيسبوك" فيديو وصورا على نطاق واسع لحفل زفاف بمحافظة الدقهلية داخل قاعة حفلات وبحضور عدد كبير من الأهالي؛ ما أثار سخرية عدد كبير من المتابعين لظهور العروس حاملا في الأشهر الأخيرة، ومرتدية ملابس الفرح، وكذلك الزوج والذي يحمل باقة الورد للعروس.
وعلق البعض بسخرية بأنها مثل فيلم "عوكل" في لقطة حضور الفنان محمد سعد، أحد الأفراح لعروس حامل، الأمر الذي شبهه البعض بتقليد الغرب؛ ليخرج الزوجان لتكذيب ما يتردد في حالة من الغضب.
ويقول مجدي محمد، العريس: "الشهرة حلوة ونفسنا نبقى مشاهير بس بالحاجة اللي بنعملها والمحتوى اللي بنقدمه مش بقلة الأدب والخوض في الأعراض، أنا لحد دلوقتي مش فاهم أول واحد واخد اسكرين من فيديو أنا رافعه وواضح فيه جدا إحنا بنعمل إيه وإن دي حفلة بنعرف أصحابنا والناس اللي متابعنا فيها نوع الجنين، ويحرف الكلام ويألف قصة على مزاجه لمجرد إنها هتجيب لايكات أكتر من القصة الحقيقية، بيقول لنفسه إيه والناس اللي زي البغبان بياخدوا كوبي ويشيروا من غير ما حتى يعقلوا الكلام أو يفكرو لمدة دقيقة مع نفسهم بجد أنتم إيه؟".
ويضيف: "يا جماعة أنتو ممكن تخربو بيوت وتخلو ناس تنتحر وتعقدو ناس في عيشتها ربنا يهديكم أي حد يشوف بوست من اللي بيتريقوا علينا يحط البوست دا في عينه، شيرو البوست دا عشان الناس اللي مبتفهمش تفهم ومحدش يقولي أنت اللي متنزلش صورك".
وتابع: "بنزل صوري أنا مش صور حد تاني بالوضع واللبس اللي علي مزاجي، واللي عمره ما كان فيه أي ضرر أو إساءة لحد، الصورة من حفلة عملناها بعد سنتين جواز".
أما العروس آية مجدي، قالت: "كل الفيديوهات نازله على الانستجرام عندي هنا والانستجرام التاني عند مجدي، ونازله بشكل تدريجي وواضح إن دي حفلة نوع الجنين، يقوم بقى الصفحات اللي نفسها تلم شوية لايكات يخدوهم سكرين ويكتبوا عليهم اللي على مزاجهم عشان هما مشافوش تربية".