سمية الخشاب: الطلاق رزق.. والستات بتحلو بعده

قالت الفنانة سمية الخشاب، إنها اتخذت قرار الانفصال عن الفنان أحمد سعد بعد سنة من الزواج، وبعد اختبارات كثيرة، معقبة: «قعدت أفكر شهور كثيرة، والزواج والطلاق حلال، وعادي الناس بتتطلق بعد أسابيع، بس إحنا عشان مشاهير الناس لازم تركز معانا».
أضافت في لقائها ببرنامج «الحكاية»، المذاع عبر فضائية «mbc مصر»، مع الإعلامي عمرو أديب أمس السبت، أن فترة الخطوبة كانت قصيرة، والطلاق رزق في بعض الحالات، متابعة: «يمكن لو الخطوبة كانت أطول مكنتش كملت، وفي سيدة كبيرة في السن مش مصرية، قالتلي في بعض الأحيان الطلاق رزق، والستات بتحلو بعده، وهو أفضل من حالات كتير، مش معنى كده أني بحرض السيدات على الطلاق، في رجالة محترمة كتير».
وأجابت على سؤال الإعلامي حول حزنها وبكائها بعد الانفصال، وانكسار بعض السيدات بعد الطلاق، قائلة: «ده كان زمان الست النهاردة بتطلق بتتجوز بعد العدة بيوم، لأن طول ما أنا عايشة في حاجة أحسن جاية، أعيط ليه حياة انتهت تيجي حياة تانية بعدها، وراحتي أهم حاجة، وسبب عدم بكائي كنت باجي على سمية كتير وبدوس عليها عشان أرضى اللي حواليا».
وأوضحت أنها انطلقت مرة أخرى بعد الطلاق وحققت نجاحًا كبيرًا، وسعيدة بتفاعل الجمهور معها، مضيفة: « لازم نحب نفسنا الأول عشان نحب الآخرين».
ومازحها «أديب»: «مفيش ندم»، لتعقب مبتسمة: «ماشاء الله ذكي يا عمرو، مفيش ندم مع كامل أحترامي لأحمد، ومش هطلع عشان انفصلنا أتكلم عليه وحش، وهات سؤال تاني وأخلص».
وكان الفنان أحمد سعد أعلن،شهر مارس الماضي عن انفصاله عن سمية الخشاب، بعد زواج استمر منذ أكتوبر 2017.
وكتب سعد عبر صفحته بموقع "فيسبوك": "أنا قررت الانفصال عن الفنانة سمية الخشاب، أتمنى لها السعادة والتوفيق، وأتمنى ربنا يقدرني على الحب والعطاء لأغلى حاجة عندي.. أولادي".
وصرحت الفنانة سمية الخشاب في أكثر من حوار إعلامي أنها اتخذت قرار الانفصال منذ عدة أشهر قبل إعلان الفنان أحمد سعد الخبر للجمهور.