تروح ولا بتجيش

طب هوه فين ؟
سابنى لمين
عمال اعد ايام كتير
نفسى اطير
وعنيا دايما ع الطريق
متشتتين
بتبص للرايحين
وتبص للراجعين
طب مش هاييجى الضهر
بعد المدرسه
يقعد على الطبليه ويوكلنى
تانى من ايديه ؟
ايوه داهايغطينى ساعة الفجر
ويبوس العنين النعسانين
لا الضهر ولا بعد العشا
طب هوه سافر مصر
هاييجى بعد العصر
الجمعه جات
فين الحاجات ؟
بقى اهون عليك
تقعد داكله
ماانتش عارفنى
انى انا بدور عليك
تيجى تاخدنى
كل العيال اهى
فى ايديها الاحصنه
وماسكين فى ايدين
وانا ايدينى مشتاقين
فى رمضان هاتيجى اكيد
وتغسل وشى وتاخدنى معاك
والعب هناك فى المادنه
وانت بتصلى وانا اقعد وراك
فى العيد هاروح برضك معاك
وتصلى واستناك
ينفع كده ؟
فى العيد كمان ماتجيش
طب اروح لمين
وامسك فى ايديه
طب مين يدخلنى فى عنيه
ويشيلنى على كتفه اليمين
وانا اهز فى الرجلين فوقيه
قربت اخاصمك لو ماجتش
وابكى بطول الليل ماانمش
ليه كل مااجى اسأل عليك
ماالقاش جواب
ياه ياسلام
لو تيجى تمسح دمعهم
ويبوسوا بالفرحه ايديك
هنا كل شىء بيسأل عليك
النخله والطبليه
والمصطبه الشرقيه
ماسك الحصيره فى يدى مستنيك
والكلب هوهو فى نص الليل صحيت
وقمت اطل عليك
مافيش
كدهو انا مش هاقدر اعيش
عمرك ماكنت كده ياغالى
تروح ولا بتجيش
تروح ولا بتجيش