عسلية الاسكندرانيه

الشاعر محمد الوكيل:
عسليه ماتردى عليه
عسليه حسى اللى بيه
ولاعشان عودك ريحان
سقتى الدلال ومتسأليش فيه
والمرسى ابو العباس مهما
يجرالى منك مش حبطل
فيكى ملاغيه
عسليه يا نجمه عاليه
ف السما نفسى تلمسها أيديه
واسقيها من قلبى كاس الأمان
واغمسها فى بحر الحنيه
عسليه يا مجننه الحاره
واقدامك نوته موسيقيه
بيغنيها العصفور على الشجر
والصياد وقت العصريه
ندرت والندر عالقلب فرض
أفرق شربات من ابوقير
للمنشيه وأهادى المأذون
والقاضى وموظفين الحقانيه
عسليه يا ليلى الطويل
والنسمه الحلوه ف الفجريه
ومراكب شوقى السايره
فعيونك يا احلا عسليه
يوماتى عالقمه بستنى
عشان ألمح طلتك البهيه
وتعدى ولا تسألى فيه
والقلب يحتار فيه المداويه
وانا اللى كانت تتهزلى
الحاره لما تدوسها رجليه
اه من حبك يا عسليه
سهد وسهر بهدله ابديه