ارحلي عني

وأيه يعني لو باعت
ما باعت قبلها غيرها
وآنا زي البحر صامد
وموجة تروح يجي غيرها
أنا اللي صنعتها بشوقي
وشوقي يكفي ميت غيرها
حغيرها مدام باعت
وحشتري لي أمل غيرها
-------------------
قولولها تنسي أشواقي
وتنسي ضعفي في فراقي
تموووت هي وآنا الباقي
قصيدة وينكتب غيرها
قولولها لسه فيه الروح
وقادر يجري لو مدبوح
وجرحك قبله يامه جروح
عدد شعرك تحملها
---------------------
وأيه يعني انتِ أخر حد
ماقبلك ياما شاف أوجاع
دا يامه السيف عليه تحد
ولا اتألم في يوم ولا جاع
وقد الجرح كان الحد
بيتحدد مع الأوجاع
وكان راجل ما زيه حد
جراح الدنيا حاملها
----------------------
وأيه يعني أمل بيضيع
أمل تاني ومهوش أول
متفرقش كتير عنده
وكان باين من الأول
حكاية تجر في حكاية
ونفس الطعنة تتحول
ويرجع تاني للمكاتب
ويكتبها على الأول
--------------------
أنا زي البحرلو هب
في موجه بس يتغير
وزي ما قلبي حب و حب
أكيد هيحب ويغير
وأيه يعني انت لو بعتي
ما نفس الطعم لو مرر
أديكي دوقتي وشبعتي
في قصة حب متكرر
--------------------------
حكايتك زيها كانت
أمل تاني نهايته يموت
وهنتي زي ما هانت
نهايتكم في قلبي موت
أنا الباقي في أوراقي
قصيدة حب موش حتموت
كاتبها بدمع في أحداقي
وبدموعي غلبت الموت
فشكراً وارحلي عني
لا أنا ميت ولا راح أموت