وطن ديمقراطي ...

أيها المواطن ...
أنت في وطن ديمقراطي
فيه ناس بتطاطي
للحكم البيروقراطي
وناس رافضة تعيش
في ذل الحرافيش
وناس تانية خالص
قررت إنها تخالص
وناس بتقول يلا نتصالِح
مع إنهم ملهمش صالِح
بس أصل الدنيا مَصَالِح
والمَصالِح لازم تتصالِح
وبالتالي لعبت دور المُصالِح
وعملت آل إيه .. بتْصالِح
قالت جماعة المَصالِح
هنعمل اللي فيه الصالِح
إيه يعني دم سال
إيه يعني تموت عيال
إيه يعني فقير غلبان
إيه يعني مفيش آمان
إيه يعني اقتصاد منهار
إيه يعني محصلش استقرار
إيه يعني في ناس طمعانة
إيه يعني الكرامة متهانة
إيه يعني مفيش وئام
إيه يعني استبداد حُكّام
إيه يعني فساد سياسي
إيه يعني الكل بيآسي
ما الكل في الآخر هيصبح ناسي
وهيقول نعمة أني عايش بين أهلي وناسي
فعليك أنك تعيش وتعمل راضي
دة كفاية أنك في وطن ديمقراطي