قطرات من دمى

1
حزنى مش بغددة
وعشقي مش للحزن
لكن منين اشتري ضحكة
تزين وشّي
المكرمش حزن
وتفك من قلبى كلبشة الهموم
2
انا اللى تاية بين
دبة دبيب الحزن ف مشاعري
وطعم ملح الجرح بلسانى
عمري ما مليت من عدلة اللوحة
بروحى الونها لو مفيش الوان
واشق صدر السما وادلدل النجمة
واعلق الاحلام وردة ف بالطو جديد
لكين الجراد اتلم على قلبي
ياكل المحصول
والناموس حالف ما يرحم فتى مقتول
3
ما اصعب العيشه
بين ضلمة الغابة
وزحمة الانياب
كداب من يقول
الدنيا خيط مفتول
من ورا كل باب مقفول
طلعلى وحش بناب
وملقتش الاعذاب
وازاى يعيش انسان
في زمن كداب
4
بس ليه يا اما انفضم بدري
ما كنتى سبتينى في الحضن الوسيع اجري
فطمتينى ليه بدري
وقولتلى ليه اقرا
مش كل شئ تقراة العيون مظبوط
اوقات كتير كنت اقرا بالمقلوب
واشخبط الصفحة
دة الضلام نعمة
قوليلى ليه يا اما مجبتنيش حلوف
لا ليه روح ولا قلب
فيه مبعزقة الاحلام
5
من قسوة الغربة
حلفت ما اتكلم
قلبى يفرفر خوف ذي طير مدبوح
وبرضه ما اتالم
انا غربتى مش غربة سما ونجوم
انا غربتى جوايه سرة شجن وهموم
في القلب مدفونة
مين اللى يهرب من قسمة مقسومة
6
حزنى مش بغددة
لكنى مش نساي