قصيدة ... عصفور النار

مولود ف قلب القفص
قفصي من جوه زنزانه
فيها من جوه زنزانه
متجسمه علي الكد
في حياتي معرفتش
غير التعب والكد
عصفور وحتي اللسان
مقطوع وكان ع الكد
عايش علي حكمه
قالها لي زمان الجد
اياك توطي الرأس
و لو مره للغربان
ولو تموت م الجوع
الفقر للجدعان
لكن الغراب عشش
في نفس العش
قتل الفراخ البداره
في قلب عباره
واخواتي ماتوا
ف الدويقه بالحجاره
والدود عاش ف قمحي
يا الف مليون خساره
سنين كتير عدوا عليه عجاف
لما اشوف ضل لابس
عسكري اجري واخاف
لحد ما الكيل فاض
والهم زاد علي الحد
قولت كده كفايه
ومبدهاش
هو اللي عاش ف القفص
يبقي اسمه عاش؟
فردت جناحاتي المكسورين
المدفونين في مر السنين
وبدأت اطير
حطيت رحالي ع الموال الحزين
فوق ميدان جامع المسجونين
عصافير من كل شق وكل لون
متجمعين موجوعين الكل يهتف
يسقط غراب البين اللي ما يعرف
الحق فين يسقط غراب البين
وقفت وسط الكل اصرخ واهتف
بصوت طالع من السردايب
عايز حقي اللي ضاع ف بطن الديب
سمعوني قالوا جبان وجاي يهتف
كيف اتولد وطلع له صوت لازم يموت
هما نسيوا مين انا
انا قبل فرعونهم هنا
انا ابن نبت النيل
اللي اتولد يوم ما خاض الليل
وطلع الخفافيش
عمري اطول من عمر النخيل
اللي اتزرع فوق قبر جدي
في ارض سينا والعريش
انا المحبوس في القفص
وفي جناحي ريش
طلقوا علينا البغال طلقوا الجمال
داست ايديهم النجسه ع الجمال
قتلوا العيال و مين يقتل العيال
كان ع الشمال عصافير كتير بتموت
وعلي اليمين سنين كتير بتفوت
انا قوتي يومها ساندوتش المش
الغريب قالوا العيال بتغش0
والنومه فين حقيقي ميهمش
جمب دبابه فوق الرصيف الناشف
فوق عمود النور جوه القبور
ميهمش
عيشه المر تجمع العصافير ف العش
بعد ريشي المقصف ما اتنفش
وبعد ما وقعنا الغراب في البير
رجعت اطير عضفور من النار والنور
جناحي دهب وصوتي مسحور
رجعت وانا عارف الدفا م الحر
رجعت علي عيشي اهدهد فيه
بعد ما هده الغراب قولت ابنيه
اتاري السوس لسه بينخر فيه
كل ما اسد شق يفتح تاني والقاه