خلينا نبني م الأول

ما تيجي يا شعب نتكاتف
ونتواعد ما نتباعد
ونبني بلدنا بإيدينا
وإيد على إيد آهي تساعد
ما تيجي يا شعب نتعلم
م الأمس اللي ضاع ببلاش
نرسم صورة بقلوبنا
لبكرة اللي لسه ما جاش
ونزرع ورد في السكة
ونشرب شاي على الدكه
ونعمل قيمة للعملة
ولو كانت جنيه فكه
ما تيجي يا شعب نتصالح
وننس مين فين الجارح
ونعطي رسالة للدنيا
بأن الخير فينا طارح
ما تيجي يا شعب نتوضى
بمية نيل تكون باردة
ونرفع إيدنا للمولي
يارب اهدي عقول شاردة
ونغسل دم في إيدينا
ونبدر دمنا في سينا
نخضر فيها أحلمنا
ونحصد حلم أهالينا
نعلي المبنى والمدنا
ونحبط شر أعداءنا
وندعي المولي يرزقنا
زي النصر ما رزقنا
ما تيجي يا شعب نتغير
ويكبر لو فينا صغير
ونصنع نهضه الدنيا
تحكي عنه وتشير
خلينا نبني م الأول
ونرفض جرحنا يطول
ونقضي بحب ع الأزمة
والشعب كله يتحول
يتحول فريق إنتاج
يصنع سلاح وعلاج
ينشر أبحاث وعلم
ويسيبه من #الهاشتاج
--------------------------------------
waleed_elwasef@yahoo.com