سوق الحلاوة جبر

ع الجزيرة حتة خبر
وف معظم الجرانين
عكنن جميع البشر
وفرَّح الحلوين
سوق الحلاوة جبر
حتى إسألوا الوحشين
سوق الحلاوة جبر
وهيِّج المجانين
والزحمة زى المطر
فى كافة الميادين
خيط الخيال إتكسر
واتجنِّن العاقلين
طالبين إعادة النظر
ف محاكمة الشياطين
سوق الحلاوة جبر
يا عينى ع المساكين
والمجلس المعتبر
ح يجيب حلاوة منين
نظراً لحالة الخطر
والشك والتخمين
على كل مصرى دكر
فى مصر أو ف الصين
يلغى بعد النظر
ويعيش مغمض عين
إيه يعنى لو يتعوَر
ويغازل الفساتين
سوق الحلاوة جبر
وإتعزز البايرين
ويعمل إيه النفر
بحلاوة التموين
عرَّة وشيخ للغفر
ومتعرفين ف كمين
أو حتى فلقة قمر
وبنكهة الياسمين
دى هى وجة نظر
طبقها على الإتنين
ح تلاقى الجميع بالنفر
أحلى من الحلوين
اللى بنى مصر
حلوانى كان حزين
ف الأصل بياع مُر
مهما الأيام تمر
قاعد ف دكانه
بيعلى بنيانه
طوبة ضلمة ...
وطوبة صبر
يا عود ريحان
الوقت حان
هو إمتحان
وبفعل أمر
مافيش مفر
من قسوة السلاطين
سوق الحلاوة جبر
بقى له سنين
والمجلس المُنتَظَر
ح يخزأ العنتين