البتوع

عديت ع البتوع
بتاع بتاع
أطرح الموضوع
من أوله لحد النخاع
لقيت بتاع منهم
فارد قلوعه
وهو بتاع زيهم
وموضوعنا موضوعه
طارح صكوك الشرا
بيقوِّى مشروعه
يا بيضة متأشرة
شمشون لمَّا إفترى
واكتفى بالمنظرة
ضحكت عليه الدموع
قام بكى
وكانت قوته ف دموعه
دليلة متأثرة ومتدربكة
محتاجة لرجوعه
ومش مدركة
إن الوداع ده مش فبركة
وشمشونها ضاع
بدأ المزاد
ببتاعة واحدة
وواحد بتاع
بدأ المزاد بدأ المزاد
وف ساعة واحدة
كان القطيع متباع
صعبان عليا أقولك وداع
باحس إن أنا شيبوب
سلمت مفتاح القبيلة
وعفة المحبوب
وبعت فرسى وقوسى
والوعد والمكتوب
ورضيت بالغنا
ف زحمة الأوجاع
أنا شيبوب أنا
يا ناااس
عنتر خلاص إتباع
وعبلة كانت عميلة
متلغم طريق الضياع
بجثة زبيبة القتيلة
يا نااااس
زبيبة حتة بتاعة متباعة
والعقد ممهور بشهادة العيلة
يا ناااااااااس
مانيش عنتر
يا ناس
مانيش عنتر ولا شيبوب
عشان أقدر أغازل المحبوب
وأقول أشعار
(و لقد ذكرتك والرماح نواهل منى
وبيض الهند تقطر من دمى
فوددت تقبيل السيوف لأنها
لمعت كبارق ثغرك المتبسم )
ولقد ذكرتك والرياح بتشدنى
وبيض الهند بتشقنى
فوددت تقبيل السيوف لأنها
بتخليكى تتألمى
شلت التراب اللى على قلبك عشان
يمكن يغور ليلك ويمكن تفهمى
شلت الغمامة وعلمتك
مش عايزة تتعلمى
حطيت كلامى فوق لسانك
مصرة تتكممى
ملعون اللى حبك وطالك
واللى حبك ولا طال
طال الطريق طال
و بيقسموا ف جتتك
أدى روحك وأدى دمى
أدى إيدى وأدى وشك
وأدى عضماية الكتاف
ملعون اللى حبك وخاف
وخلاكى بتسلمى
وملعون اللى حبك وغشك
وخلاك فى عشك
مدبوحة بتتبسمى
وعشان أنا غالب وبقيت مغلوب
مركون طول عمرى وممنوع
فاعل ف الجملة وجيت منصوب
والمفعول به الواطى هو المرفوع
مركوب راكب راكب مركوب
فرع من الأصل ومقطوع
ومصر أحافظ ع النوع
راح أدادى يا حدادى
وح طاطى للواطى
وأشارك ف حدادى
وأموت على كيفى
اشرف عبد العزيز مشرف