علامة أستفهام ؟؟

لساك مستني
وبتغني؟؟
غنوة عن العدل
وبتحلم بالفجر
يبان وظلام الجهل
يرحل بلا عودة
لساك واقف
علي باب الوحدة
بتنادي النور
تحلم بالسور
اللي أتهد
علي راس الليل
تحلم بالسيل
اللي يغير مجري التخاريف
اللي في روسنا
تحلم بجبال م الحرية
تعملك سد
تحميك من ظلم الاباليس
وطغاة الغد
لساك ماسك سيفك معكوس
مكسور السن
بتحارب هكسوس وماجوس
وقريش يوم بدر
وصلاح الدين
قبل التطبيع من يوم حطين
قرر هيبيع مش بيرد
لو كان تفكيرك ملبوس
مش زمن الجن
البطل القش في اسطايرك
وخيالك بس
ومفيش ف العش المهجور
الا الغربان
ظهرك مكشوف
وفي لا حصان ولا طاقة نور
مليون خاين يطلع ويدوس
علي ردم احساسك
من ساسك من شعرك
من راسك
من قلب ضوافرك
جواك مليون منجوس
ولباس الخوف اللي معشش
في سماك معروف
لسه بتتظاهر
بالقوة
وبتلعب دور الانسان
خربان من جوة
وبتخالف
كلك تالف
متحالف
بعضك مع ضدك
انه يهدك ويعدك
ضمن الاشباح
منتش سباح
بتقاوم ضد الامواج
من غير مجداف
والريح مجنون
هيحشك من طولك
ويطولك
لو فين ما تكون
لو بطن أمك حن
وشالك
راح يقطع ع السكة
خيالك
ومجالك
خط ومحدود
للتوهة تعود
والخطوة
في دربك مشبوهه
رهنونها
لخارج بلدانك
وميدانك
قلبوه للرقص
هجص وتهليب
فاهم يا لبيب
ولا دماغك متباعة كمان
مش فاضل غير بعض حناجر
وبواقي لسان
وكمان مربوط
تشبة للتور
في سواقي الاوهام بتدور
لابس طرطور
وبتنطط جوه مخطط
مرسوم بالضبط
فاهم ولا انت بتسعبط
واقف ع الخط
لو قرصك تعبان
في ودانك
هتقول حرمت
قدامك موتك
ودمارك شدك للخلف
وبتجري في صف الاموات
وسحابة فقر متبعاك
مولود للقهر ومتعاقد
مع مليون عام
دي سياسة وسيستم لنظامك
قدامك
قفصك واترافع
او دافع عن نفسك
حاول واتقدم خطوة لقدام
حكم الإعدام
والسجان مستني رقبتك
والتهمة ثابتة ولبساك
بدور جواك
علي بذرة
تطرح بالخير
وده مش مسموح
ممسوح التفكير
ومصيرك دايما مجهول
وبواقي الروح
لو حاولت تطلع يوم منك
راح يطلع غول
ويدمر أجمل طموحاتك
ويزود كوم اتهماتك
خاين وعميل
دايما تتامر ع السطلة
والغلطة بفورة المرادي
بتعادي في مين
بحر من الطين
بتشله
وذل موطيلة
ووصلت الارض ولساك
من جوة الكهف المهجور
بتنادي سماك
تبعت لك نجماية تنور
بركة دنياك
وبتضرب
كفك علي كف
مستني الفيل
لما يعدي
من خرم الابرة
الفكرة
قديمة مصدية
والحرية
كلبها سعران
لساك بتقرفص سهران
بتعد رمال الصحره
تهرتهل بكلام الجاهل
والقمر المخنوق
بيراقبك
بيطمن قلبك
مش راحل
ونهارك مش جاي بالساهل
لساك فاهم أنك مظلوم
اشرب لكعانك من ويلك
خليك موهوم نيلك
مش ليك
اياك تتحرر من سجنك
و أي قيود
معهود
انك تفضل ميت وتنادي الموت
ضايع والصوت
مالهوش مردود
وتلف تلف
وتعود
علي نفس النقطة
اللي اترسمت
من مليون عام
تتكعبل مش عارف
توصل
علي أي شطوط
صوتك مكبوت
وبتعجب من هذا الحال
وحياتك ميت الف
علامة للاستفهام
============
رابط القصيدة
http://www.youtube.com/watch?v=EyFNmoNMzTY&feature=mfu_in_order&list=UL
===========
ايميل الشاعر
mabouzeid87@yahoo.com