ماسوشى

المشهد :
عبثي آخر حاجه
المنظر:
داخلى بغباوه
الجو ساعات بيحرر... وكتير يقلب بطراوه
نور الصبح بيتشاكل مع عتمة ليله
والشمس بترفض تدَّخل ف هيافتهم
علشان بيجيلها صداع
والدّوا صنع بلادى ما فيهوش ماده فعَّاله
والحاله زباله

والميزانيه... ما بتسمحش
سعر الباندول غالى وما بيتباعش
نسمة ريح ناعمه بصوت إعصار ...عاصف جدًا
الديك نايم فى العشه وبيكح ... والبيض هوّ اللى بيدن
ريحة برفان متعبى - من بير السلم - تدهش أموات الحى
صعب تفرق مين رايح منهم من مين جاى
كلثوم بتغنى دويتو مع أورتيجا
على ألحان الراحل... عمر دياب
الغنوه زى الشيبسى بطعم كباب
كلماتْ : عم صلاح
" بلا دوا بلا عيا بلا مر"
الزحمه بتخنق ف الاحساس
والقهوه متحلاش غير ساده
بطل المشهد غايب كالعاده
ماقبضتش فلوسه من كام شهر
والحلم عروسه بتِتْزين لاصحاب المهر
القلب اتبرَّى من دمه
وعروق الجسم اللى ما بتنبضش
وكرات الدم الحمرا بتطنطت ع البيضه
إكمن الاهلى ديما بيفوز ؟!
اهبل اللى يربط نفسه بماتش
الحكم الساذج (أنتي بيوتك)
ينزل للملعب من غير صفاره
ولا كارت
المشهد:
عادى
المنظر:
فاضى
الجو: مُمِل
الشتا ببروده بيجيب الحل
ويصرف للعتمه كام ساعه ذياده
والشمس بترتاح ف غياماته
بطل المشهد يحضر يوم القبض
والدم بتِغْريه الرَّعشه فتِولِد نبض
قررت اركب عربيتى الصبح مسخنهاش
يمكن تُشعر ببرودة قلبى
أو قلبى يفوت
واشرب نفسين واحبسهم
بيقولوا التدخين بيموت
وافضل أكح لحد ما أتمرمغ فى الارض واعافر
المشهد بيكرر نفسه روتين ساخر
باقعد أتأمل فى عقارب ساعتى
فالنوم بيروح
واسهر طول الليل مجروح
أعصر ف آلامى وفى جنانى
واشرب كوكتيل...مش بلوشى
كل الناس حواليا تصنيفهم سادى
ودا شئ عادى
أصل انا تصنيفى ماسوشى