فين الورد

في الورد وجنينه قادر " ع " الكتابة
بس خايف الكتابة تبان كذابة
أصل عمري ما شفت ورد فتح في غابة
لا فيها مية ولا حتى نور
ولا فيها حاجة غير ديابة
ما شفتش ورد يرتوي بدم الولاد
ولا شفت ورد فتح بدموع العباد
فين الورد ؟
لما أشوفه مرة واحده في البلاد
مش بس ها كتب
أنا ها ألغي من دولابي أي ثوب كان للحِداد
فين الورد ؟
و زارع الورد يا خلق مات
دا حتى الورد الصناعي اللي " ع " الطرقات
سرقوه وسعروه الأفاعي في محلات
وخلو كل الجمال في عيونا مات
أنا ها كتب عن اللي زرع الأرض خير
وخيرها وعرقه صب في جيب الغير
عن اللي عاش يِلقط لقمة عيشة زي الطير
عن اللي حلمة أبسط " م " البساطة وقلبه كبير
عن اللي رغم الذل كان عاشق لأرضه
ورغم الجوع صان شرفه صان عرضه
ويوم موت ابنه كان فاكر أداء فرضه
وراضي بقضاء ربنا ولا عمره يوم عارضه
وعن خالق الجمال في السما والأرض
اللي حرم علينا الربا والقرض
وسهل علينا السنة وخفف الفرض
وموفر لينا الرحمة ليوم العرض
هو دا الجمال اللي أعرفه
وأعرف أكتب فيه وأنصفه
وأحاول رغم ضعفي أوصفه
لكن انت وردك واللهِ لسه " م " أعرفه
اكتب إنت عن ورودك والأماني والآمال
إنسا واقع الكل عايشه واكتب إنت م الخيال
سبني أكتب " ع " الفساد حتى لو توبته مُحال
سبني أبحث وبطريقتي عن مواطن الجمال
صعب أكدب " ع " الحقيقة بكلمة حلوة " م " الخيال
والحقيقة فرضه روحه والخيال ما لوش مجال
افتكر إنت طفولتك شوف طفولة العيال
تعرف إن الفقر قادم مش مجرد احتمال
لما أشوف راتب موظف مش مكفي الديون
وأما نور العين يقل " م " الدموع جوه العيون
وأما أشوف واحده بتفتح باب عفتها للزبون
وأما أب يبيع ضناه وفي ثانية واحده عليه يهون
والشباب الحلو اللي ماشي والمخدر جوه جيبه
هو العيب عيب الحكومة ولا أهلة ولا عيبه
وانت حتى لو قابلته تنصحه ولا تسيبه
ولا رأيك إنه قدره وصعب يهرب من نصيبه
وأما المعدة تبقى مجرد مخزن جبنه أو زيتون
وأما الأرحام يأجروها المحتاجات ومعها البطون
يبقي الورد أكيد اتغير لونه الحلو في العيون
والكتابة الوقتي عنه تبقى حاجة من الجنون
-------------------------------------
waleed_elwasef@yahoo.com