صمام خنزير ...كلوة حمار ...فشة جاموسة ...إتفقوا يا علمائنا الأول

نشر الموقع أمس خبرا مفاده وجود جدلا دائرا بين علماء الأزهر بسبب جواز مفتي ديار مصر الدكتور علي جمعة لزراعة صمام من قلب الخنزير في عمليات القلب المفتوح والغريب بالأمر جواز المذهب المالكي الذي يقر أن الخنزير طاهر إلا في حالة موته يصبح نجسا !!
يا جماعة قولوا أيوه موافقين وخلاص .هو حد عارف من سنين بيزرعوا إيه بأجسادنا ؟؟ أو حد شاف . وإذا شاف المريض بعينه القلب أو الكلوة أو الفشة أو الطحال والكبدة هيعرف إزاي أنها فشة خروف أو كلوة حمار أو طحال كلب المهم المريض يعيش وخلاص .لسة هنفتعل قضية نظل شهور نتكلم فيها على الفاضي والمليان ثم مش أحسن من اللي بيحصل في بعض المستشفيات ؟؟ بيدخل الواحد عشان يعمل عملية الزايدة يطلع بلا كلاوي أو طحال !! ..وبعدين يقولوا مات بسبب فلونزا الخنازير ..ثم السجق والنقانق والمرتديلا إللي شغالين عليها لأن المدام في إيدها حنة هي عبارة عن إيه ؟؟ والله اللي بسمعوا بقايا حيوانات ماتت فطيس والكنتاكي والهمبورجر .دكتور سيبك من كل اللي داير من حوارات بق بطن وصدر المريض بقيقة وقص ولصق يا خويا براحتك لسة هتتشرطوا !!.مش لما نجتمع على رأي واحد بالدين .المذهب المالكي يقول لحم الخنزير يغدو نجسا إذا مات الخنزير !!!.أومال أنا شفت الخنازير متبهدلة آخر بهدلة بالتلفزيون في مصر ليه وبأمارة خنزير صغير واحد فر من إيد السائق .شوفوا طالما الموضوع طرح على مائدة القضايا والنقاش إلحقوا أنفسكم وطالبوا بالمرة فرصة وحلم عمره ما يمر تاني بأرض واقعكم .نادوا أن القلب يكون قلب الأسد ..بصراحة حاجة تشرف وريتشارد هيكون مرتاح بتربته ..قبل كده عملوا من الخنزير إسطورة بحجة الإفلونزا ..والمرة دي بحجة عمليات القلب المفتوح ؟؟..ممكن حد يفهمني إيه الحكاية ؟؟ حيوان ملعون ونجس يطلع لينا في رأس السنة بموضوع !!.دكتور أزرع قلب مصنوع بالصين ببطارية من تايواند مش أصلي. تجميع مصري عشان لو زهق الواحد من الدنيا يجي عندك تشيل له البطارية ويتكل على الله على الآخرة عدل ..والتقرير مات بسكتة بطارية مصدية .صمام خنزير ...كلوة حمار ...فشة جاموسة ..ده لو رسيت القرعة عليه والدور علشان يعملها .وّإذا عملها ونجحت هيعرف بعدين قطعة الغيار اللي إتزرعت بجسمه مصدرها من فين ؟؟ ومراته أول من يعرف حينها ..من أول صدام بينهم عندما تثور بوجهه وتقول له أنا بنت ..... ؟؟؟ يرد عليها على طول ....هو ...هو ..أي أيوه ...أيوه .وستين هو .ساعيتها تعرف اللسان اللي زرعوا لزوجها كان لسان مين .