العقارب واقفة

محجره ما بتمشيش
والليل طويل
والفجر ما بيجيش
واقفة من زمان
من حوالي ستين عام
الحال هو الحال
والكلام نفس الكلام
الطفل يتولد
وفجأة يكبر ويموت
وطول الرحلة
الكلام شكل السكوت
النور يظهر في السما
والقلوب جواها خوف
لولا أديسون والسما
ما كنا يوم هنشوف
كام اختراع هزنا
من ستين عام
غير اختراع الكرسي
المطرز بالكلام
العمر طويل وبيعدي
كأنه ما جاش
أسرع م الصوت والضوء
وأرخص م اللي تمنه بلاش
لا حفرنا حسنة في تاريخ
ولا حتى في الفلاح
حتى اللي عاش مناضل
حصاده كان الجراح
بكرة زي اليوم
يا دوب بنكبر يوم
وتزيد أعداد المشاكل
وتزيد أعداد الهموم
بذور الأرض شوك
والجرح للإنسان
وكل بذور الأمان
صبحت للجبان
نفسي أشوف بكرة جديد
صباحه حب وليله آمان
سطور في تاريخ مجيد
وشرف في كل مكان
نفسي لو قبل الموت بساعة
أشوف القبور للأموات وبس
أشوف بلدي بدون مجاعة
وأشوف رئيس بشعبه حس
أصل جدي زمان قالي
يا ابن بنتي الدنيا حلوه
ماعرفش إن كان خدعني
ولا بجد كانت حلوه
رغم كان الفقر
غنوه في كل البيوت
والبيوت من طين
والسقف من عنكبوت
--------------------
elwasef2007@yahoo.com