أنا بكره مترشح رئيس

أنا بكره مترشح رئيس وح أخلي كل الشعب يهيص
واللي ح يجي وينتخبني يبقي يقابلني ف قسم بوليس
وح أوريكوا اللحمه حقيقي ولا أكل بصاره ولا فول تدميس
وبعد ماجوعتوا سنين وسنين واللحمه ليها ف البطن حنين
آن الأوان للعيشه الطين تنسوها بقي رحل التدليس
وبعد ما كانوا علينا جواسيس وكل شويه يجينا بوليس
أتحررتوا من المهاويس وأمن الدوله ماتوا فطيس
وكل فوله وليها كيال وخلاص ضمنا يجينا المال
وشويه شويه أستني ياخال الريس ح يفك الكيس
شبعنا من الفقر وم الجوع وخلاص مفيش ف الخطوه رجوع
لو حتي جابولنا كئوس ودروع ثورتنا بقت هي الموضوع
ويارب عجل وأحنا مسامحين باسم الأخوه وباسم الدين
مش ح نكون فيهم شامتين بس الرحمه هارنا الجوع
ولادنا وضحوا بالأرواح وأحنا معانا ف القلب جراح
ولغاية مانخلص ع الأشباح مش ح نقول عمرنا ماهو راح
لسه بكره الجاي بنور والفرحه جايه عليها الدور
وح نقول للفقر اتفضل غور ومصر بكره تعيش أفراح
بس الفلول ح تروح علي فين وأكبر مافيهم ذل وطاح
مع تحيات صعلوك في شارع الملوك الشاعر / نبيل عبدالعزيز