هرشة دماغ

على كوكب المريخ
الهم ما يتلم
سلم لي ع السُكّري
ظأطط يا ولد العم
وحط ف بطنك بطيخة صيفي
وأوعى تعض ف مرة رغيفي
دول بيعاندوا ف جد أبونا
لأجل العيشة ما تصبح غم
-ده حتى النسر الحيلة إتغم-
فكك نفض أحلق كبر
أوعى ف يوم يا حلاوة تهتم
وعيش بسعادة
عيش بزيادة
أوعى تفتح مخك مرة
غمض عينك
سد ودانك
اعمل ميت
يمكن بلدك تصبح حرة
وأوعى يا هذا تقولي لماذا ؟!
دول عبوا لنا الهوا ف إزازة
والدستور والانتخابات
والحرية والأصوات
والاستدعا للنيابات
أصل الميت لسه ما مات !!
نكتة جديدة يا ست تفيده
من مجموعة بهلوانات
والسيرك شديد مليان طنطيط
حتى التظبيط بقى ليه درجات
والتليفزيون بالصوت واللون
شغال دبور عمال بيزن
أنفخ حرض إكدب ولع
أصل الكدب يا روحي ده فن
والحدوتة متغطية
بلحاف فيبر م النملية
لأجل البيض ما يزيد يا عنيا
والإنتاج يشطح ويرن
والعفريت يخرج م العلبة
يلعب لعبة
يمسك خشبة
يحشّ الرقبة
يرمي الكلمة ويا العِمة
يرقص رقصة بس بذمة
حتى الشيء اللي اسمه فلول
عمّال يُحرك زي الجن
وكله يهون فسبيل السُلطة
حتى السَلطة بحكم السن !!
أوعى تفكر أو تتهور
أوعى يخش ف بالك ظن
أوعك تهرش هرشة بريئة
يمكن تحصل أزمة يا عم
أوعى تشارك أو تتغير
أوعك تضرب
أوعك تطلب
أوعك تفهم أو تتنور
أوعك تصحى
يمكن يصبح عندك دم
واقفل بابك وادخل جوه
أوعك تطلع حتى ل بره
دفي مكانك ويا زمانك
يمكن بيضك يفقس مره
وحط ف عينك حصوة ملح
لأجل ما تفهم هذا الشرح
يمكن تركز
يمكن تعقل
يمكن تهرش هرشة بريئة
يمكن يصبح عندك دم !!
14/11/2011