قصيدة متخافيش عليا من كلامهم

عارفك بتحبينى
وإن كان الريس يوم خانهم
أنا مش هاخونهم
سرق قوتهم وقوت عيالهم
ولا فكر يوم يصونهم
بس أنا عارفك قلبك كبير
زعلتى منهم عشان هتفولوه
وايه يعنى
ماهو مسير الغبى يفهم
عمره ماهيعيش بهيم
وإن كانوا إتبعوه يوم
أنا اتبعته يومين
بس يابخت اللى عنده بدل الاطيان عقل زين
يعرف فين الحلو وفين الشين
اوعى تفتكرى إنى بحييهم
ولا باشمت لا سمح الله
أنا بس بأفكرك إنهم فى يوم ضحكوا عليكى
باعوكى حتة حتة وأتآمروا مع اللى يعاديكى
ويشهد على كلامى الزمان
وإن جولى فى يوم بعد ما ابنيكى
مش هاديهم فيكى ولا مكان
هو انا ابنيكى وأسلمك بإيدى للى خان
ماتكونيش فكرانى لسه جبان
قافل بابى عليا وبأقول مالى انا ومال الجيران
ومدام الحزن بعيد عن بيتى هأعيش حياتى فرحان
يبقى لسه ماعرفتنيش
د أنا اللى لو ماعجبنيش يوم حالهم
هأقول ماعجبنيش
فمتخافيش عليا من كلامهم متخافيش