معلمين ومعلمين

النهاردة كنت فى رحلة مليئة بالتناقضات بس خلينى أقف معاك عند إضراب المعلمين علشان كتير سألونى على رأيى مش عايز أقولك زى الناس مطالب فئوية وإختيارهم للتوقيت أساليب ضغط وبرضه مش عايز أمسك العصيا من النص طبيعتى الشخصية وكمان طبيعة شغلى بتحتم عليا أنى قبل ما أصدر حكم على حاجة أقرب بنفسى من الموضوع علشان أقدر أصدر حكم سليم بس خلينى أفتكر معاك مواقف بعض المدرسين معايا زمان دخلنا مدرس وأحنا فى الثانوية العامة بالتحديسد فى سنة أولى ثانوى كان مدرس الدين يدخل يقعد فى أخر ديسك ويمسك كتاب المعلم الخارجى ويقعد ينقل طب بلاش هتقولى دىى حصة دين ياعم هو فيه مدرس فى مصر بيشرح فى حصة الدين هأقولك بلاش دى وأنا فى تالتة ثانوى كان مدرس العربى يدخل يقول بص أحنا هنعمل صفقة مع بعض أنتوا سبعين طالب فى الفصل يعنى لو كل واحد أتكلم كلمة هتخرج سبعين كلمة وده ميرديش ربنا بص أنا أنام وكل واحد يعمل اللى هو عايزه بشويش وأعرف مدرس أقسم قدامى قال والله العظيم لو خدت مليون جنيه فى الشهر برضه هأدى دروس خصوصية .....النماذج دى توصفيها الطبيعى " معلمين" جمع " معلم" اللقب بتاع حسن شحاتة وفيه برضه نماذج كتير معلمين بضم الميم " اللقب بتاع مهنتهم " كل مهنة فيها الكويس والوحش من حقهم يطالبوا بضمانات مالية ورواتب محترمة تتناسب مع المعيشة ولكن من حقنا أحنا كمان نطالب بإلغاء أعمال السنة علشان نجبرهم يمنعوا الدروس الخصوصية من حق مدرس الألعاب أو الموسيقى أو الكمبيوتر أو الزراعة زيادة مرتبه من حق المدرس الخريج حديثا يؤمن مستقبله علشان يعرف يتجوز ويعيش بس مش من حق الحيتان يظيتوا فى الزيطة ويكوشوا كمان على اللى مش ليهم من حقنا نشوف المعلم بتاع زمان" بضم الميم" لأننا قرفنا من منظر المعلم" بكسر الميم"
وقفة
جماعة " أحنا أسف ياريس" عملين فيلم تسجيلى عن المخلوع والشعب وبيقولولك أيه تخيل أب سهر وتعب وربى أبنه 30 سنة والأبن لما كبر طلع جاحد وطرده بره
ردى بقى
مفيش أب بيسرق فلوس عياله ومراته لا كمان وبيجيب أصحابه أو اللى شغالين معاه يسرقوا فلوس مراته وعياله مفيش كده ومفيش أب بيجيب لعياله أكل مسرطن ويشربهم مياه صرف صحى مفيش أب يلم من عياله فلوس عمال على بطال بحجة أنها خدمات ويارتها خدمات دى إتاوة والنبى فيه أب بيلم من عياله إتاوة مفيش أب بيزود فى رجالة الأمن بشكل هيستيرى ويأمرهم أنهم يضربوا عياله بالرصاص ... مفيش أب بيسقط لما العدو بيضرب عياله على الحدود
ده مش أب بس أنتم لو عايزين تبقوا عيالهمتفرضوش علينا ده علشان ده مش أب ده .... ولا بلاش علشان أنا مؤدب