لعدم مراعاة قواعد الإملاء

_ مفتتح مالوش لزمه_
أبو رجل مسلوخه
اللى دخل بيتهم ف نص الليل
بعد أربع تشهر و عشر تيام بالظبط
ما كنش قاصد
يقطع عليه
قراية الفاتحه
( لعدم مراعاة قواعد الإملاء)
العفاريت
اللى بتلبس ملكى مع أدان المغرب
ف الحواديت
و دخولها بنفس الطريقه البايخه
من الكام بشله اللى ف وش الحيط
عشان تتنطط قدامه ف الأوضه
زى كوره شراب
و النداهه
( على حسب كلام سته )
بتعرض مواهبها ف فن التقليد
و لازم جمهورها يكون واحد
و بيفصل بين الاتنين باب
و أم شوشه
و نكشة شعرها ع الفاضى
و ضوافرها اللى لمه بتقف
بتلمس صوابع رجليها
و مساخيط صغيرين
( ما اتعملهمش فيش جنائى قبل كده )
لون عنيهم
يشبه بالظبط لون مريلته
لمه القلم لاحمر طفح فيها
كل دا كان سبب رئيسى
لشقاوة سحابه نونو
ليلاتى تهرب من حضن السما
تقلع حفاضتها البامبرز
و تستخبى ف بنطلونه
( فاصل )
ست الحسن
اللى دوخت عيال 5/3
و حروف اسمها فضلت محفوره
على السبوره
على تخت الفصل
و جلد الكراريس
البنت اللى خاصم بسببها
(محمد يحى )
و (محمود عبدالفتاح
و عشانها بس
حك جميع الفوانيس
البنت اللى شطارته
مأهلتوش يلعب معاها استغمايه
فعشان يثبت جدارته بيها
شرب سيجاره ف قلب الحوش
( بعد التدريب لفتره طويله قدام مرايه )
تانى يوم
و ف لحظة خروجه من الطابور
و هوه بيجر تلت أربع قارات
اتربطوا ف رجله
لحظة م اتنادى اسمه
يمكن ما فكرش ف المدير
ولا ايده اللى هتورم من التلاتين جريده
أد ما كان بيفكر فيها
"و ف طلب "استدعاء ولى الأمر
و ف المسخوط إياه اللى ف مفتتح القصيده