الحب ... بيقولوا الحب قادر .. بيقولوا الحب شاطر

مافى مرة يامؤمن تقعد مع صاحبك فى القهوة ولا حتى على ناصبة الفول والشاى اللى فى آخر الشارع إلا ويعدد مزايا زوجته التى ذهبت مع الريح ! سيقول لك كلام كتير بدءا من الحديث عن حنانها وهدوئها ورقتها وخفتها وجمالها لكنه فقط سيسبق كل كلامه بكلمة دى كانت ، ومش بعيد يقولك دى كانت بتحط برفان غالى بتشتريه بشىء وشويات علشان أشم رائحتها من بعيد ! وتحت بند دى كانت يمكن لكل رجل أن يحكى مايكفى لكتابة مجلد أو حتى عمل سلسلة متصلة من مسلسلات الصابون التركى التى تتخطى الألفين حلقة .
أما إذا انتقلنا آلى جانب الستات فحدث ولا حرج ، وأولنا رسملى ع السما دنيا فيها الهنا وقال حنعيش يومين ، لغاية وصحيت من الالم لقيته كان أوهام وعذابى مستنينى ... وصولا إلى تشريح جثة اللى مايتسمى وتعبئتها فى أكياس بلاستيك
وبين هذا وذاك تمتلىء محاكم الأسرة فى مصر ، بحكايات مالها أول ولا آخر عن دا كان ودى كانت
وبما أن معدلات الطلاق فى مصر بقت تفوق أى معدلات فى العالم ! لذلك يجب ألا نأخذ حكايات دا كان ودى كانت على محمل الهزار والتريقة والتندر فأولادنا وشبابنا سايبنا غرقانين فى اجترار الماضى وعملوا عملتهم وبقت الجوازات متزدش عن ست شهور ، طيب والحل نعمل إيه علشان نبطل نجتر الماضى ونبكى عليه ؟ وعلشان نجيب لزق بغرا لشبابنا مع قسيمة الزواج ؟ واحدة صحبتى اقترحت إننا نعمل أغانى عن الحب كتير ،
لأنها شايفة إن أغانى اليومين دول بقت حوريلك او انا مش مبيناله أنا ناوياله على أيه ، ودى وغيرها فيها نية الانتقام والغدر وضربت مثال بنجاة وقالت عاوزين أغنية بيقولوا الحب قادر بيقولوا الحب شاطر تبقى نشيد يومى فى البيوت ، تقوم الست لما تتخانق مع جوزها ولا الزوج لما ينفعل على زوجته يقولوا الحب شاطر ويتصالحوا ! طبعا مش حقولكم صحبتنا اللى اقترحت كده حصل لها أيه مننا احنا الستات لمجرد اقتراحها ، ويمكن كانت فقدت حياتها لو كررت هذا الاقتراح أمام الرجال أيضا ، لكن على كل حال إحنا الستات الطيبات قمن بالواجب ، وعندما نتذكرها الآن نقول عليها ونحن نمصمص شفايفنا : ياسلام دى كانت أميرة ... بلسم كده ياخواتى بلسم
كلمات قصيرة :
- أيام قليلة تفصلنا عن شهر رمضان كل سنة وكل المصريين بخير يارب ، أنا هنا بوجه كلامى للستات
المصريات الطيبات بقولكم جميعا إياكم وتخزين الأكل قبل رمضان ، فمن تخزن الطعام تمنعه عن محتاج وتحرم عشرات وربما مئات الأسر منه ، وتتسبب فى زيادة الأسعار ، قبل رمضان أنوى نية خير ألا تشترى فوق حاجتك .
- حادثة بشعة وقعت فى إحدى مدارس حلوان فقد أبلغت إدارة المدرسة عن طالب بلطجى تسبب فى جرح طولى بظهر زميلة أغلق ب 150 غرزة ، بالطبع المدرسة لم تبلغ إلا بعد هذه الحادثة الكبيرة ، ولكى تخلى مسئوليتها ليس أكثر ، أما الحكايات عن بلطجة هذا الطالب وفرضه إتاوات على زملائه لتسريبهم من الحصص فهى جميعا تدين المدرسة وكل القائمين عليها ! ياوزير التربية والتعليم مطلوب تحرك عاجل حتى لاتتكرر المأساة .