بالصور .. الحلو ويسرا ضيوف شرف حفل فرقة بساطة

صعب قوى النهارده تسمع حد يكتب ويغنى عن حاجة بخلاف الحب و الهجر والفراق .. لكن أعضاء فرقة بساطة الفنية التى استطاعت أن تحقق نجاحاً كبيراً فى فترة قصيرة نجحوا فى ذلك ..
تصوير : محمد لطفى
الفرقة أحيت حفلاً ناجحاً بالأمس فى ساقية الصاوى وسط حضور غير مسبوق ، وفى البداية قدم المهندس محمد عبد المنعم الصاوى الفرقة للجمهور حيث ذكر أنها تتمتع بحس وشعور فنى غير عادى والدليل الجماهيرية الكبيرة التى استطاعت أن تحققها فى وقت قصير ، ولذلك تتمتع بساطة بمكانة خاصة لدى عدد كبير من نجوم الفن .. حيث حرص على حضور الحفل كضيوف شرف المطرب الكبير محمد الحلو والفنانة الكبيرة يسرا .
أصل الحكاية - كما تقول فرقة بساطة - أن نبيل لحود هاوى مزيكا و عازف عود وملحن .. وابنته ماريز مغنية وتدرس فى المعهد العالى للموسيقى العربية قسم عود. وإيهاب عبد الواحد هو صديق العائلة .. ملحن وعازف جيتار وكان يغنى مع ماريز فى مدينة الرحاب لغاية ما اختاروهم علشان يعملوا أغانى مسلسل حنان وحنين للفنان عمر الشريف فى رمضان 2007 .. وبعدها تعرفوا على الشاعر إسلام حامد فوجدوا عنده كلاماً مختلفاً وبدأ المشوار .. فى الطريق بحثوا عن شعراء يعبرون عن المعانى النى يبحثون عنها فوجدوها عند الشعراء : د.سامى الرفاعى و محمد سرحان وسالم الشهبانى وعبد الحميد الحباك وكمال كامل ... وخلال فترة بسيطة اندمج الكل وأصبحوا فرقة موسيقية واحدة ..
##
وقامت الفنانة الكبيرة يسرا بتقديم أفراد الفرقة وأشادت بهم وبموهبتهم .. قم بدأت بساطة حفلها برباعيات الخيام كلمات أحمد رامى .. ثم قدموا أغنية الليل للشاعر سالم الشهبانى وتقول كلماتها " ساعات الليل يبان جافى ساعات قاسى ساعات وافى ساعات جارح ساعات شافى ساعات برد وساعات دافى ساعات يشبهني ف غيابك وأنا مكسور على بابك كأنى وردة ف كتابك كأنى بحر مش صافى " ..
ثم شدت الفرقة بأغنية عسل النحل من كلمات إسلام حامد وألحان نبيل لحود وتقول كلماتها " سيبناك وهاجرنا .. على بلاد غيرنا .. سيبنا جدايلنا.. مربوطة بفيونكة لمتنا حواديتنا ..ودفانا فى بيوتنا .. سيبنا تفاصيلنا.. وأهو تهنا فى السكة .. بابا الغالى مهما حكيتلك عن أحوالى .. عن توهة قلبى وخيالى مش عارفة أتصرف من غيرك مش لاقية روحك تسمعنى .. وبلوفر الغربة مصقعنى ..حضن الدنيا هنا بيشوك .. والذكرة فى قلبى بتتلكك علشان تهرب توصل عندك وأرجع تانى لأيام خيرك " ..
كما قدمت بساطة أغنيات بمبوناية كلمات محمد سرحان وألحان إيهاب عبد الواحد ، وتقول كلماتها :
بونبوناية ...
وكل الناس محتارة فيها
بونبوناية ...
اوعي غلط تحكم عليها
بونبوناية...
واضحة مفيش حاجة تداريها
بونبوناية...
اياك يوم تتسلي بيها
##
ثم شدت الفرقة بواحدة من أجمل أغنياتها وهى أغنية " حالنا حال " كلمات محمد سرحان وألحان إيهاب عبد الواحد حيث تم تقديمها فى الحفل كعرض أول للفرقة ، وتقول كلمات الأغنية " ركبت الصبح تاكسى بكلم فى نفسى إيه الناس دى كلها إيه ليه كل طلعة نهار بجد مش هزار بنشكي لبعض ع اللي احنا فيه مادام كترت عيوبنا وحالنا مش عاجبنا في بعض منفكرش ليه بلدنا زهقت معايرة وتايهين في دايرة وده اللي وصلنا ليه حالنا حال.. ليه طموحنا بس نجيب عيال كلنا بنسأل نفس السؤال.. ليه مبنبصش بعيد ليه ياناس.. هي مش في بالنا م الأساس دي علم مرفوع في ماتش كاس.. حتي ده حلم و بعيد " .
قدمت الفرقة أيضا أغنيات ماما كلمات عبد الحميد الحباك وألحان إيهاب عبد الواحد ، وإلحقينى كلمات إسلام حامد وألحان إيهاب عبد الواحد ، وأرفضى كلمات إسلام حامد وألحان إيهاب عبد الواحد .
وقبل نهاية الحفل قام الفنان الكبير محمد الحلو بتحية الفرقة ..حيث عبر عن إعجابه الشديد بها وقال : فى الحقيقة الناس دى هى اللى لازم تتسمع .. بساطة فعلاً تقدم فناً جميلاً وراقياً وإحنا لازم نشجعهم ونحييهم على أعمالهم " .. كما قدم أغنية زورونى كل سنة مرة كتحية منه للجمهور الذى قابله بعاصفة من التصفيق ..
معروف أنه كان بين الحضور زوجة مايسترو الكرة المصرية صالح سليم .. وهي فى الوقت نفسه حماة الفنانة يسرا وكان تجلس بجوارها طوال الحفل .
##
##
##
##
##
##
##
##