عمرو أديب: لو حلفت لي من 30 يوم إنها هتحصل كنت هقولك إنت راجل محشش

مواقفه المعروفة ولهجته اللاذعة هي التي أدت لصدور قرار - سيادي - أجلسه في منزله وعاد مرة أخري ولكن بقرار من جهة سيادية لم تكن تفصح عن نفسها من قبل وهي الناس عمرو أديب الذي كما قال - ذاق الذل وقالوا له 'روح افتحلك محل جزم' لأنك مش هتشوف التليفزيون تاني يحكي تجربته في السطور القادمة..
حوار : شريف بديع النور
تصوير : أميرة عبد المنعم
* علمت أن مسئولي قناة الحياة اتصلوا بك في الواحدة ظهرا وظهرت علي الهواء في الخامسة عصرا ماذا حدث؟
كلموني فعلا من عند الدكتور سيد البدوي في الواحدة ظهرا وقالوا لي عايزينك تطلع علي الهواء فقلت لهم : ماشي فرحت فعلا وأنا مش عارف هطلع ولا لأ وإيه هيكون رد الفعل علي ظهوري لأني كنت عارف إن هناك قرارا سياسيا بعدم ظهوري مرة أخري علي شاشة التليفزيون وظهرت فعلا يومها .
* يوم ظهورك كان من اتخذ القرار مازال موجودا كيف سمح لك بالظهور إذن؟
لأن كل حاجة كانت اتغيرت بالفعل بعد 25 يناير كل حاجة تغيرت فرحت وأنا مش مصدق ولعلمك أنا لغاية ما بقيت علي الهواء كنت مش مصدق وبعدين تاني يوم لما رحت البرنامج بتاعي ما كنتش مصدق إني هكمل بس كملت .
* لماذا أوقفوك من البداية؟
إحنا كنا في نظام اللي يفتح فيه بقه كانوا بيذلوه لا يمكن هيجي أسوأ من اللي كنا فيه لا يمكن هييجي ذل ومهانة قد اللي كنا فيها كان الناس بتضرب في الأقسام قدام مراتتهم بالبراطيش كانوا بيعملوا فيهم كل حاجة إحنا كنا في عصر أسود ومهبب .
* سيد البدوي وقف بجانبك في وقت صعب لماذا تركته سريعا ورجعت لقناة أوربت؟
لأني مش ندل هم تحملوا خسائر كبيرة بسببي ووقفوا بجانبي كل السنين اللي فاتت ظهوري في الحياة كان سببه إغلاق استوديوهات أوربت وبمجرد فتحها مرة أخري عدت لهم .
##
* وكيف كان رد فعل سيد البدوي علي تركك للحياة خاصة أنهم كانوا قد بدأوا في تجهيز استوديو خاص لبرنامجك؟
{تفهم جدا الوضع .
* ما رأيك في المتحولين؟
كتير فجأة مش واخدين بالهم من حاجة إن إحنا بقي عندنا حاجة اسمها اليوتيوب ده عليه كل شغلك فمهما قلت ومهما عدت فيه ذاكرة أرشيفية لا تنتهي فعيب يعني بس عاوز أقولك إن الأحداث دي غيرت كل الناس يعني النهاردة الأهرام وصفتها ثورة كله دلوقتي بقي صوت واحد .
* لماذا اتصل بك أحمد عز بعد إيقاف برنامجك؟
شوف إنت يوم ما أحمد عز كلمني في التليفون قال لي : علي فكرة إنت كنت السبب إن ماكانش فيه رضا في مصر وأنا عاوز أقولك احنا شيلناك علشان الناس ترضي طيب دلوقتي يا أحمد الناس رضيت إيه رأيك في مقدار الرضا في الستة أشهر اللي ماكنتش موجود فيهم رضا عن انتخابات مجلس الشعب رضا عن كنيسة القديسين رضا عن الإعتقالات رضا عن الحكومة رضا عن البطالة هل عمرو أديب هو اللي كان مخلي الناس دي كلها مايرضوش ولا الحزب الوطني هو اللي كان سبب عدم الرضا كان بدل ما يشيل عمرو أديب يشيل الحزب الوطني .
* ما هو أبرز ما تغير في مصر؟
كل حاجة تغيرت بنشوف أشياء لو كنت حلفت لي من 30 يوم إنها هتحصل كنت هقولك إنت أكيد راجل محشش مصر كلها تغيرت ، لكن أبرز حاجة إن ماعادش فيه ذل حضرتك النهاردة مفيش حد هيوقفك في لجنة ويقولك إديني 20 جنيه محدش لما تبقي جايب أربع سنين جيد جدا محدش هيمنع تعيينك بلدنا هتبقي حلوة قوي كل المليارات اللي اتسرقت تقول إن البلد كان فيها فلوس كتيرة جدا المهم إن الذل راح من مصر .
##