موسوعة جينيس هى عبارة عن كتاب يحتوى على الأرقام القياسية العالمية المعروفة .. وهي من أدق المراجع التى يتم الرجوع إليها فى معرفة الأرقام القياسية, وأول نسخة صدرت من هذه الموسوعة كانت عام 1955 . منذ نصف قرن وحتى وقتنا هذا والموسوعة مرت بالعديد من التطورات .. يعنى زمان كنا نسمع إن واحد روسى دخل موسوعة جينيس علشان أخترع أول طائرة ركاب تصحح أخطاء الطيار بصورة أوتوماتيكية .. أو إن طالباً سوريا اخترع أصغر قمر صناعى فى العالم .. أو شركة تقوم بإختراع أول كرسى يساعد على " الانتخة " لأنه مزود بثلاجة وتليفون. وبقى الوضع كما هو عليه إلى أن حل عصرنا الفهلوى بفكره اللولبى وتغيرت فكرة الأصغر والأكبر وأصبحت جينيس فاتحة صفحاتها لأكبر سلة معلقة على فندق .. وأكبر كلمات متقاطعة فى العالم .. و أتخن رجل وأقصر فتاة وأجمل وزة وأحلى بطة وأرشق معزة وأرفع فتلة وأنا وأنت !! . ومش كده وبس .. ده الموضوع كبر وأتمط وبقينا مش عارفين نلمه وبقينا نسمع إن أقصر رجل فى العالم يتقابل مع صاحبة أطول أقدام فى العالم ودخلا معاً موسوعة " الارقام التهيسية " ، طب إيه قولك لما أتخن رجل فى العالم يتزوج وعملوا له الفرح على صفحات الموسوعة. وعشان إحنا بنحب " نزيط فى الزيطة " .. محافظة حلوان بتاعتنا دخلت موسوعة جينيس لأكبر نجفة العالم تكلفت الملايين .. عادى ! .