بالفيديو .. ريم ماجد : هو نفس الموت .. وهي نفس العيشة !

بالدموع، نعت الإعلامية ريم ماجد ضحايا قطار أسيوط في برنامجها "بلدنا بالمصري" على فضائية "أون تي في".
وقالت ريم "كل الدم اللي دفعناه في السنتين اللي فاتوا كوم، والدم اللي دفعناه على شريط القطر امبارح كوم تاني، أبهات وأمهات مش هيشتروا لبس العيد تاني، ولا لبس مدرسة، ولا هيفرحوا بدرجات حلوة في الشهادة ولا بالشهادة الكبيرة".
وربطت ريم بين ضحايا حادث قطار أسيوط وبين شهداء أحداث شارع محمد محمود بقولها "ناسيين اللي دفعوا دمهم دول دفعوه ليه؟ دفعوه عشان نبطل نموت من الأكل والشرب وفي العبارات وحوادث الطرق وعلى شريط القطر وتحت التعذيب ومن القهر ومن الحسرة، ماتوا عشان نخلص من التركة القديمة".
وخاطبت ريم جماعة الإخوان المسلمين بقولها "يا أهل الله ياللي في السلطة وفي الحكم، يا أهل الله يا أولي الأمر، ياللي وصفتوا نفسكم إنكم بتوع الثورة وحطتوها وردة في عروة الجاكتة، حجتكم مش مقبولة وعذركم مش مقبول، عذركم أقبح بكتير من ذنب اللي فاتلكم التركة القديمة ورحل بالدم".
وتابعت ريم "الناس اللي قلبها على الثورة بصحيح ريقها نشف تهاتي، والنتيجة نفس الموت هو هو، ونفس العيشة هي هي، بنفس القهر بنفس الذل بنفس التعالي بنفس التهديد بنفس الجبروت، وزيادة كمان شوية تخوين على شوية تكفير على شوية تكميم، عشان السايب يخاف من مصير المربوط، وناسيين إن الحاجة الوحيدة اللي خدناها من الثورة، إن العباد بطلت تخاف إلا من خالقها وإننا بطلنا نسكت وبطلنا نمشي جنب الحيط ونكفي خيرنا شرنا، فالعبوا غيرها".
الفيديو