ولد مصري عجيب الطهر والقوة بيفتح للسما .. كوة ولد مشهور بإنه قريب شعاع النور قريب النهر في الفيضان قريب البحر لما يرقص المركب يعوز يرحم يفور .. يقلب . قريب الطبل لما يرقص الحلوة قريب الشعر لما يظبط الميزان قريب المغنة .. صهبة وسلطنة وسطوة قريب الشعب .. لما ينزل الميدان ولد مصري اذا صلي .. يكون أقرب إلي الرحمن وبنت ندية كالقلة عيونها تروي في القيالة ما تخليش غريب عطشان واذا اكتحلت .. كإن الكحل دا أفيون يعيش العاشق المفتون .. أبد سهران واذا ابتسمت يدوق مجنونها أحلي جنون ويستغني عن المية وقوت اليوم ( مايستغناش عن الأوطان ) واذا ثارت .. عشان الحب مات مجنون عشان العدل في الشارع سقط مطعون يضيء المقلة والكحلة مشاعل شعب ميت مليون *** ولد مصري وبنت صبية مصرية يشد القلع تفرد له الشراع هية راجلها وهي أمه وأخته وحبيبته صمد لجمال وهجانة بقلب حديد وإيد مضمومة عريانة وهي معاه .. وهي حماه وتتحامي في وش البلطجة بهيبته فأوعي تكون واوعي تكوني ندمانة وإوعي تقولي .. اوعي تقول حلمت وشتت الأحلام بعيد بيا *** زبالة .. مرتع الحلاليف جنينة .. منها فيها كنيف فمش ذنبك يا ورد بلدنا إنه مكان ما عادش نضيف ومش ذنبك يا فل بلدنا إن الفصل فصل خريف ومش ذنبك ياحالم بالرغيف أبيض إن الظلم والإظلام سوا في رغيف قلوبهم ضلمة .. مش ذنبك يقولوا عليك عبيط اضحك زمان قالوا علي التنزيل كلام تخريف *** ح يتنه الإنسان .. يحلم وفي يوم م الأيام إعلم : ح يحقق حلمه إذا كان شعب بحاله ..... وانتوا طليعة شعب أرق بناته أشد وأصفي رجاله أحن قلوب علي أحواله مين يبقاله لو انتو يئستوا مين يا أحن قلوب يا أشد أرق بنات ورجال .. مين يبقاله؟