البنات والجيم .. إيه الحكاية ؟!

مفيش بنت مش بتحلم بالرشاقة والنشاط والحركة .. وعشان كده "الجيم " أصبح منافساً قويأً لمراكز العلاج بالأعشاب و الطب التكميلي ... والغريب إن كتير من البنات أصبح الجيم جزء مهماً من حياتهن سواء فى المناطق الغنية و الفقيرة ، تعالوا نعرف منهم تفاصيل أكتر ..
" سارة محمد " شايفة أن الجيم مجرد موضة فيه بنات بتجري وراها .. وتضيف : بصراحة أنا مش " تخينة " لكن بروح الجيم مع اصحابي في الجامعة واللي اقنعوني إني لازم أحافظ على رشاقتى ، و بدأت انظم أكلي ورحت للجيم وممكن اكون كسبت لياقة .. اكبر لكن بصراحة ضيعت وقتاً كبيرأً .
وتقول " روفيدة محمد " : طبعا الرياضة مهمة جدا لأنها أذا لم تنفع الجسم لن تضره .. و برامج التلفزيون هي اللي أجبرتنا ناخد بالنا من رشاقتنا و انا فعلا خسيت حوالي 5 كليو خلال شهر و نصف من غير ما أحرم نفسي من الأكل اللي بحبه .
بروح الجيم فسحة وفرصة أقابل أصحابي و جيراني .. ده كان سبب وجود " مروة إبراهيم " في الجيم ، و الطريف انها كمان بتروح مع أمها وهناك تنافس بينهم " مين اللي هيخسر وزن اكثر " ! .
أما " فاطيما أحمد " فتقول : بجد بتضايق جدا من البنات اللي رايحة الجيم عشان تضيع وقت او يكون الهدف هو اعجابها بالكابتن او المدرب لأنهم بيزحموا الجيم على الفاضي ، و انا عن نفسي بروح الجيم لأني بتخن بسرعة و كمان بخس بسرعة .. وعشان كده رحت الجيم عشان ألاقي طريقة لتثبيت وزني .
أما داليا الشواف وهى دكتورة علم النفس فتقول : الفتيات والمراهقات هم الفئة الأكثر تأثرا بظاهرة الهوس بالجيم بسبب عروض الأزياء والتي تحتاج إلى جسم نحيل ، فتبدأ البنت للجوء الي الأماكن التي تسهل عليها فقدان الوزن سواء من خلال الجيم او عمليات التجميل ، و انصح البنات أنه في كل مرحلة ليس عليك سوى تغير نمط غذاءك وعدم النزول الى الجيم بدون ضرورة ملحة ، واذا احببت اكتساب بعض المرونة واللياقة لا تقسي على نفسك في التمرين و لا تعرضي نفسك لمخاطر استخدام الرياضة العنيفة .