قصائد

ولسة
إلي الشاعر الجميل / حلمي سالم
ولسة الحلم بيعافر .. ف بطن الليل ..
وبينقر علي الدماغات ...
لحد الصبح ويسافر .. مع المتاهات ..
ولما أسأل عليه فينو ؟
يقولوا مات ..
واشوفه ساعات بيتنقل ..
وياخد م الصور 100
ملاغية ف عيون حبيبين علي الكورنيش ..
لا ف ايدهم يعرفوا مصيرهم ...
ولا قادرين يسيبوا بعض ..
وبستاني النهاردة ماعدش يتصاحب عليه الورد .
ولا العصافير علي كفوفه ... بتعزف أحلي أغنية ..
ف عز البرد ..
وتجري لجل ما تصبح علي الناس ف البيوت ..
دغري.. ..
تصحي البسمة ف عيون الفواعلية.. ف عز الحر
وتغزل وسطهم خضرة و.. ترسم نهر ..
وحيلي مش كما امبارح ...
وخلقي عاد كلام جارح ...
ما عدشي يحتمل ممكن .. ولا يمكن .. ولا جايز ..
ومش ه الحق اصحي حد ..
ومش
هالحق
اصحي
حد
محكوم
محكوم بمسافة ووقت ..
و1100 من الأمثال ..
وباعوم علي عوم الدنيا ساعات ..
وساعات أتهبد أتشال ..
ومحال... راح أغير بالكام كلمة كلام متشال
... وف عقل عيال محفور علي باب دماغاتها ...
شيطان وملاك ..
ف انقسم اتنين
واتنين .. واتنين...
وب احسبني باصغر واصغر..
واصغر..
وأنا خايف بكرة الصبح ..
وأنا طالع شغلي وكل الناس نايمين ..
ابص .. ف مرايتي ..
علشان ما أساوي الباقي .. من شعري الواقع ...
مأشوفنيش ........... !!
الدنيا
الدنيا البالعة ما فيها .. بتتمطع ..
وتشاور ده ..
فيبطل كل عمايله ..
ولا تاني تعاند فيه..
ولا ترجع لجل تحايله ..
ترجع تتمطع وتشاور ده ..
وأنا دوري مجاش .
استني ولا مستناش ..
والدنيا اللي مرحماش ..
ولا عمرها يوم هتبطل ..
وبتضرب ومشيفاش ..
غير لما تخلص كل ما فيها مشاورة ..
وبشاورة بتمسح ده ورا ده ..
ولا حب يعيش..
ولا حلم يعيش ..
يحيا التنتيش... طول ما الدنيا البالعة ما فيها بتتمطع ..
وماتخترنيش.........!!..