خاص هيثم احمد زكى :أحمد زكى اسطورة لن تتكرر ولا يوجد فى النجوم الشباب امتداد له ..و دورى فى 《كلبش》نقطة تحول

أهم تصريحات هيثم أحمد زكى ..
*مفيش ممثل امتداد لاحمد زكي ده اسطورة لن تتكرر.
*والدي صنع تاريخه واكمله ورحل ولن يأتي مثله .
*مقارنة اى ممثل باحمد زكى ظالمة لاى فنان .
*لم يدعمنى اى شخص بعد رحيل والدى.
*ابويا كان بيقولى انت الوحيد اللى نفسى يكون احسن منى.
*فى اللحظات الاخيرة فى حياته كان خايف عليه من قسوة الدنيا بمفردى.
*بسبب ما عانيته من وحده اتمنى تكوين اسره وانجاب اطفال كتير.
*فى يوم عيد ميلادى ابوبا كان متقمص شخصية السادات .
*ابويا فى عيد ميلادى غنى بصوت السادات.
*لست مهوس بالفن كأبى ويكمن ان انسحب اذا لم اجد ما اقدمه.
*الفن ليس رقم واحد فى حياتى.
*احب خطيبتى جدا وسنتزوج قريبا.
*كان بيقولى لما اموت هتعرفوا قيمتى لما تحطوا تاريخى وافلامى جنب بعض.
*كان اب شديد حنان وانا كنت نقطة ضعفه.
*دورى فى كلبش نقطة تحول .
ورث عن والده سمار بشرتة وشرقيته وايضا ورث عنه الوحده واليتم المبكر..رغما عنه يحمل منه الكثير بسبب الجينات..يرى مقارنة اى ممثل بابيه ظالمة للممثل ..كان نقطة ضعف ابيه وبعد رحيله اصبح ابيه نقطة ضعفه فهو يحمل على كتفه اسم لاسطورة الفن العربى هو ابن فنان لن يعوض ولن يتكرر نحاور فى السطور القادمة هيثم احمد زكى و يحدثنا فة ذكرى رحيل والده عن احمد زكى الاب والانسان..
هل كنت ترغب بالتمثيل او اقحمت فى هذا المجال بسبب انقاذ موقف بعد وقاة والدك اثناء فيلم حليم ؟
الاتنين انا كنت بحب التمثيل جدا وكان نفسى امثل وانا فى الجامعة ووالدى شجعنى جدا وقالى عاوزك تكون احسن منى لكن اجبرت على دخول المجال دون استعداد لانقاذ الموقف بعد وفاة والدى.
انت شخص مقل جدا فى الظهور والتواجد الاجتماعى وفى اعمالك الفنية حتى انك لا يوجد لديك صداقات كثيرة او لقاءات صحفية هل انت تفضل الوحدة؟
انا مش شخص انطوائى لكن لا احب الظهور كثيرا تحت الاضواء والاختلاط بالوسط الفنى وفى حالة وجود عمل اتحمس له اشارك فيه دون تردد.
هل لانك ابن احمد زكى توقعت دائما ادوار البطولة المطلقة؟
لا والله ابدا بالعكس بحس ان الادوار اللى عملتها بطولة ضرتنى وبالعكس فى ادوار كنت مشارك فيها حققت نجاح كبير.
هل هناك اعمال برغم قصر عمرك الفنى انت راض عنها واخرى غير راض عنها؟
ايوه اكيد يعنى مثلا دوران شبرا بحبه جدا وبحس انه عملى تواجد مهم بعكس فيلم البلياتشو بحس انى تسرعت فى الموافقة عليه.
هل اسم احمد زكى يحملك دائما حمل على كتفك يجبرك على عدم المشاركة فى اى عمل دون المستوى؟
ده حقيقى اسم والدى دائما يحكمنى ويجعلنى افكر كثيرا قبل قبول اى عمل.
هناك من يرى انك تشبهه فى الاداء لحد بعيد هل تتعمد تقليده ام انها جينات الابوه داخلك؟
لا اعرف ولا اشعر انى اقلد والدى لكن غصب عنى اى شخص حتى عادى بيكون وارث من والده الكثير من التصرفات والطباع لحكم الجينات فعلا.
هل تحب مقارنتك بوالدك؟
ده بقى اكبر ظلم اذا كان من الظلم انك تشبهى احمد زكى باحد ابناء جيله ينفع حد يشبهه بواحد لسه طالع انا فين واحمد زكى فين ده واحد عملاق من اهم نجوم العالم العربى انا مين علشان اقارن بيه انا لسه معملتش حاجه.
هل كنت تشعر وانت صغير وتعى قدر اسم احمد زكى ام انك بحكم صغر سنك لم تكن تدرك مكانة ابيك؟
لا طبعا كنت عارف ده جدا ومقدره وحاسس بيه وهو كان بيقولى ده بكره تعرف قيمتى.
هل كنت حزين بسبب انشغاله الكثير عنك؟
اكيد بس كنت فاهم انه شخص مش عادى ولما كان بيقعد معايا كان اب حنون جدا وعطوف وبيكون معايا زى اى اب وابنه نلعب ونهزر مكنتش بحس انه بيعيش النجومية فى حياته العادية حتى لما كنا بنروح اى مكان لكن كنت بلاقى حب الناس الكبير ليه ده كان بيسعدنى.
انت تعيش الان فى منزل والدك هل تؤرقك الذكريات وانت تعرضت لصدمات عصيبة فقد للام ومن بعدها الاب والجد والجدة كيف واجهت الوحدة واليتم المبكر؟
بصى مكدبش عليكى انى مدمرتش نفسيا وعانيت معاناة شديدة جدا لا توصف لا يمكن لاحد ان يتصورها ولا اتمنى ان يمر احد بما مررت به ان تكون وحيدا فى الحياة شئ مؤلم جدا لكن الحمد لله قدرت اتغلب على ده واقاوم لان الحياة صعبة جدا ومبتحبش اللى يستسلملها.
هل دعمك اى احد من اصدقاء والدك داخل الوسط الفنى او تولى امرك بعد وفاته وكان حريص على السؤال عليك؟
لا لم اجد الدعم من اى احد ولا يسأل احد يسأل عمى حتى اليوم سوى الملحن ياسر عبد الرحمن اما بتقى الاصدقاء اختفوا بوفاته.
خطبت منذ فترة قصيرة فتاة من خارج الوسط الفنى هل ما مررت به من وحده ويتم جعلك تصر على تكوين عائلة فى وقت مبكر ؟
طبعا اولا انا بحب خطيبنى جدا واتمنى نتجوز قريب وحلم حياتى اكون اسرة وارزق باطفال كثيرة واعمل عيلة كبيرة.
هل تجد تشابة بين ما حدث لك من فقدان للوالدين مبكرا مع ما حدث مع والدك من يتم مبكر ايضا؟
اكيد ربطت بين ده لكن الحمد لله على كل حال.
والدتك هالة فؤاد صاحبة اجمل وجه فى تاريخ السينما ماذا ورثت عنها؟
اعتقد الهدوء لكن انا متأثرتش بيها زى ما تأثرت بوالدى لانى فقدتها فى وقت مبكر جدا كان عمرى 9 سنوات فلا اتذكر الكثير عنها.
احمد زكى معروف بالعصبية الشديدة هل ورثت ذلك عنه؟
هو مكانش عصبى فى المطلق كان اكتر حاجه بتعصبه لما حد يخرجه بره الشخصية لانه بيكون مركز جدا فى ده وانا اه ورثت عنه العصبية بس فة اضيق الحدود يعنى لو حد عصبنى جدا بنفعل لكن غير كده انا شخص هادئ بطبعى.
هل انت مم مدرسة التقمص مثل والدك ام انك تخلع عنك الشخصية بمجرد توقف الكاميرا؟
صدقينى معرفش انا كده او لا انا بمثل وبندمج بس مش عارف لو كانت الشخصية بتعيش معايا او لا.
هل كنت ترى والدك وهو متقمص للشخصيات حتى فى المنزل؟
لا لم الاحظ ابدا ان والدى متقمص اى شخصية فى حياته اليوميه الا فى فيلم السادات كان يتكلم ويتصرف كانه السادات حتى انه فى عيد ميلادى كان يغنى لى مع الحاضرين بصوت السادات وكان يتعامل مع الجميع ومع عامل البوفيه انه رئيس جمهورية حتى معى كان يتعامل بشخصية السادات هذة هى المرة الوحيدة التى لاحظت ان الشخصية ملازمه له حتى فى المنزل.
فى اخر رحلته مع المرض بماذا كان يحدثك و يوصيك؟
كان مهموم وخائف جدا على بعد رحيله لانه يعلم انى بمفردى وان الحياة قاسية كان خائف طول الوقت ويوصينى على نفسى وينصحنى ودايما يقولى خلى بالك من نفسك انا عايزك احسن منى محدش فى دنيا اتمنى انه يكون احسن الا انت خليك قوى وكمل مسيرتى بشكل عام كان كل تفكيره فى اللحظات الاخيرة من حياته هو ما مصيرى بعد رحيله.
هل تريد ان تكمل مسيرة والدك؟
اكمل ايه ده راجل عمل التاريخ كله ورحل هو عمل كل حاجه ممكن تتعمل لميت سنة قدام ده عمل 3 مرات ظابط ولا مرة تشبه التانية عمل رجل بسيط فى اكتر من دور ولا دور شبه التانى عمل بواب وملاكم و رئيس محدش ينفع يكمل بعد احمد زكى ده عملاق مش لانه والدى لكن لانه فعلا عملاق فى الفن محدش هيجى زيه.
احمد زكى كان يرفض الدوبلير فا نام على سقف القطر و تعرض للخطر كثيرا فى مشاهد اصر على اداءها بنفسه هل انت من نفس المدرسة؟
اكيد انا برفض دوبلير وبحب اؤدى اى مشهد بنفسى حتى فى البلياتشو فى مشهد ضرب السكاكين فى السيرك كنت انا من ادةى المشهد ودخلت بجوار الاسد فى نفس الفيلم وفى فيلم كف القمر اصريت ان اتعلم الرقص بالتنورة وقدمته بنفسى طول الفيلم.
هل كان احمد زكى يشعر انه فنان متفرد وله مكانة كبيرة؟
اكيد كان عارف قيمتة كان دايما يقولى بكره تعرف قيمتى لما اموت لما تحط تاريخى جنب بعضه هتعرف انا عملت ايه لما تحط البرئ جنب زوجة رجل مهم جنب البيه البواب والهروب هتعرف قيمة ابوك وانا سايبلك مكتبة افلام كبيرة هى تاريخى حافظ عليها واتعلم منها عايزك احسن منى.
احمد زكى كان مجنون بالفن ويأتى فى المرتبة الاولى عنده هل يمثل لك الفن نفس المكانة؟
بحب الفن بس مش زى ابويا عندى اولويات لحاجات غير الفن.
يعنى ممكن تعتزل اذا لم تجد ما يناسبك؟
وارد جدا انسحب اذا لم اجد جديد مختلف اقدمه لست مهوس بالفن كوالدى.
ما جديدك الفنى؟
اقوم بتجسيد مجرم فى مسلسل كلبش 2 وسعيد بانضمامى للعمل لان العمل حقق نجاح بالفعل العام الماضى واقدم فيه شخصية مختلفة عن كل ما قدمت سابقا.
تخليت عن شعرك تماما فى كلبش2 هل كان هذا اختيارك ام اختيار المخرج؟
اختيارنا احنا الاتنين اشتغلنا على المظهر وفضلنا نجرب حاجات واستقرينا على اللوك ده واتمنى ينال رضا الجمهور.
كيف تستعد لاى شخصية تقوم بالتحضير لها هل تضيف لها من روحك؟
اكيد بفضل احضر كتير وبشتغل على تفاصيل الشخصية وطفولتها وبضيف من عندى اكيد.
هل درست التمثيل ام انك تعمل بروح هاوى؟
انا درست بيزنس اما حبى للفن بالفطرة وبالتأثر بوالدى اخذت ورش تمثيلية لكن الغالب فى عملى هو موهبة واجتهاد شخصى.
هل تستعد لشئ فى السينما؟
لا انا لا يمكن اجمع بين عملين مش متخيل اكون بمثل فى دور بشنب وفى التانى من غير شنب شعر مختلف ملامح للشخصبة مختلفة انا اعيش واتعمق داخل الشخصية لذلك لايمكن ان اقدم عملين مع بعض.
لو اتيحت لك فرصة اعادة احد افلام والدك تختار فيلم ايه؟
الامبراطور فانا اعشق هذا الفيلم وكنت اتمنى ان اجسد شخصية والدى فى هذا الفيلم لو اتيح لى هذا.