رمضان فى مصر حاجة تانية (3)

كل سنة محلات الحلويات بتتفنن فى تقاليع وحاجات جديدة فى رمضان، ومع كل سنة تظهر أصناف جديدة من الحلو ولكن يفضل رمضان بخشافه وقمر دينه على قائمة الشهر الفضيل.
يا ترى إيه قصة الخشاف وإيه الاسم ده وإيه أصله وفصله؟!
الخشاف هو قطع من الفاكهة المجففة زى التين والقراصيا والزبيب والمشمش والبلح وأحيانًا قمر الدين، ارتبط الخشاف برمضان وبالمصريين لدرجة أن فى طقم محطوط فى كل نيش اسمه طقم الخشاف وده بُيستخدم لمدة 30 يوم فى السنة ويرجع لمكانه بعد كده.
الروايات بتقول إن الخشاف أصله تركى أو فارسى وكلمة خشاف فى اللغة التركية معناها التمر المنقوع، وبالفارسى هى كلمتين خوش آب وده معناه الشراب المسكر أو العصير.
بعد كده خد المصريين عن العثمانيين طريقة الخشاف وبقى شىء مقدس لشهر رمضان فى مصر بيفطر عليه الصايمين وبعدها يصلوا المغرب وبعدها ياكلوا وجبة الإفطار الأساسية.
الخشاف اليومين دول غير بتاع زمان والطبق شهد تطور فى مكوناته مع الزمن، كان الأول عبارة عن التمر والزبيب واللبن وبعد ازدهار التجارة بين مصر والشام فى العصر المملوكى زودوا عليه مكونات تانية غالية. سوريا هى المصدر الأساسى فى مكونات الخشاف وفى من كل صنف أشكال وأنواع.
وبحسب بعض المصادر فى كتب التراث فى دمشق أن بياع الخشاف ده كان له اسم وهو الخشيفاتى وده كان موجود فى الأسواق بيبيع الخشاف للناس.
كما ذكرت أحيانًا قمر الدين بيتم إضافته على الخشاف.. فما هى يا ترى قصة قمر الدين؟
فى قصتين للتسمية دى، أولها إن الاسم ده نسبة إلى اسم صانعه وده كان اسمه، والقصة التانية إنه كان بيتباع فى الأسواق مع رؤية هلال رمضان فسموه قمر الدين تيمنًا بالوقت المبارك للشهر الفضيل.
قمر الدين مشروب سورى الأصل ويقال إنه جه بسبب شهرة عصير المشمش فى الأساس الليّ كان له شهرة كبيرة فى بلاد الشام قبل الفتح الإسلامى، ومع الفتح اتعرف فى باقى البلاد وأصبح طقس رمضانى عندنا للنهاردة.
موطن المشمش الأصلى هو الصين وبعد كده بقى بيتزرع فى البلاد ذات الجو البارد ووصل لسوريا ومصر. المشمش فى مصر له مكانة خاصة لأنه قصير الموسم جدًا، حوالى شهر فى السنة بينتج فيه بكميات كبيرة ومن هنا جت فكرة تجفيفه علشان التجار يقدروا يخزنوه لأطول مدة ممكنة وأصبح يجفف فى شكل قمر الدين.
قمر الدين عبارة عن عصير المشمش وعسل بيتغلى على النار وبعد كده بيتفرد على لوح خشب مدهون بزيت الزيتون ويقطع على شكل ألواح.. وطبعًا قمر الدين ده لا يخلو منه منزل فى رمضان.
ونفضل نقول إن رمضان فى مصر حاجة تانية والسر فى التفاصيل.