جوزك على ما تعوديه.. عزيزى الرجل لست وحدك صائمًا

فى رمضان كلنا بنصوم فالفكرة إنك صايم دى مش نافعة،بمعنى آخر كلنا صايمين وتعبانين مش أنت لوحدك عزيزى الرجل. فى رمضان تلاقى الرجالة يرجعوا من الشغل يناموا لحد الفطار وبعدين يفطروا ويصلوا ويناموا لحد السحور.
وأول لما نطلب منهم أى طلب تلاقى بوز طلع كده مش عارفة من فين ويقول لك أنا صايم ومش حعمل حاجة.
أنا بقى كزوجة صايمة وبعمل كل حاجة وأنا صايمة إيه؟ من الأبطال الخارقات ولا إيه؟، ما هو الطبيعى أن الأولاد بيتعلموا فى رمضان وبيروحوا التمارين وأنا بروح الشغل والحياة بتستمر فى الصيام عادى.
لكن فكرة إنى مش حعمل حاجة علشان أنا صايم دى مش نافعة خالص، لأننا كلنا صايمين وبنعمل كل اللى ورانا علشان لازم نشتغل ونذاكر ونحضر الأكل واحنا صايمين،تخيل كده فى يوم من الأيام قلت لك على الفطار أصلى صايمة فا مقدرتش أعمل أكل حيبقى موقفك إيه؟ أو مثلا مش حودى الأولاد المدرسة علشان أنا صايمة ومش قادرة أصحى بدرى.
طبعًا مفيش حاجة اسمها كده، فا ناخد بالنا بقى أن فى بشر صايمة معانا على الكوكب وبتشتغل وبتمارس يومها بشكل طبيعى وتلقائى.. فحجة أصل أنا صايم دى مش حتنفع خالص لأنك عزيزى الرجل لست وحدك، أيوه لست وحدك صائمًا، مصر كلها صايمة حتى إخواتنا المسيحيين صايمين فا يا ريت بقى أسطوانة أصل أنا صايم ومش قادر دى متشغلهاش لأنها قديمة ومش نافعة.
وأهلا بيك فى معترك الحياة فى رمضان سحور وفطار ومذاكرة ومدرسة وعدم نوم وكل حاجة
وكل سنة وأنتوا طيبين ورمضان كريم.