حميد

من كل النجوم والشخصيات العامة فى كل المجالات فى الحياة لو حد سألنى أحب أقابل مين منهم هيكون ردى بلا تردد حميد الشاعرى.
حميد يمثل لى أكتر من كونه مطرب أو مؤدى، هو أكتر من شرايط كاسيت أو أسطوانات أو دلوقتى أغانى أون لاين، حميد شريط ذكريات ورفيق فى مشوار، مع أنيّ معرفوش معرفة شخصية،ولكن هو متمثل فى أغانيه بالنسبة ليا كصاحب وصديق.
‏عمرى ما عرفت أحدد أغنيتى المفضلة من أغانيه، مفيش أغنية واحدة، فى كثير وكلهم يحتلوا المركز الأول لما أجى أقّيم أقربهم لقلبى.
وده شىء نادر علشان مهما كان النجم محبوب من جمهوره ومعجبيه بيكون دائمًا عنده أغنيتين تلاتة بالكتير بيكونوا مفضلين عند كل واحد بس مفيش مغنى بنحبله عشرين تلاتين أغنية إلا لو كانت تمثلنا.
تنوع وتميز مش طبيعى، سواء غنى لوحده أو دويتو أو مع مجموعة.
أعتقد حميد أكتر فنان طبق فكرة العمل الجماعى والمدير اللىّ بيفرز الناس اللىّ معاه ويوقفهم جمبه وياخدوا حقهم من النجومية والتقدير والشهرة، بيغنى ديويتوهات من التمانينيات والتسعينيات وبيطّلع ناس لمعت معاه وانطلقت وشقت طريقها بمفردها بعد ما اتبناهم فنيًا، دى إدارة و leadership skills مش موجودة فى مؤسسات أحيانًا.
لو قابلته فى يوم مش عارفة هقوله عايزة أسمع أغنية إيه ولا إيه؟
هطلب منه يغنى: و لاعدش الصبر صديق، ولا قمر الليل بيضيء وخدتنا الدنيا فى توهة وسابتنا فى نص طريق ولاعدش الصبر صديق.
ولا : هو أنتِ من باقى البشر ولا أنتِ من أهل القمر، أنا عينى عشقت طّلتك، بيدق قلبى بطلعّتك.
ولا: باجيلك من ورا الأحزان ولسة فاكر العنوان، أنا حضنك وتكوينك والمكتوب على جبينك.
ولا الرائعة:يا ريتنى نسمة صبا سارية على خدودك، ياللى الچمال والصبا اتجسدوا فى عودك.
ولا أرزاق: متاخدش فى بالك تحلالك عيشتك وتروق أرزاق الخلق على الخالق مش على المخلوق.
بصراحة مهما كتبت من أغانى مش هعرف أختزل، ليه الليّ يحب بزيادة ولا أفهم بقى والفستان الأسود والدويتوهات الرائعة زى ضلاية شجرتنا وعينى وبتكلم جد وزى الطيور .
حميد نزل ألبوم جديد حلو من فترة قريبة وبغض النظر هنتفق أن الألبوم حلو كله ولا نصه ولا أغنية واحدة حلوة فيه، تتبقى حقيقة راسخة أن حميد الشاعرى صديق جيل على اختلافاته، أغانيه فيها ناس وقصص ابتدت وأخرى انتهت، تتبدل فيها المشاعر والأماكن والوجوه و لكن تظل الذكريات باقية وتأخذنا من أيدينا لعمر عشناه بالطول والعرض وارتبطنا فيه بصوت عبدالحميد الشاعرى أو حبيبنا «حميد».
وأظل أردد وراك: أنا مهما كبرت صغير.
كل سنة وأنت طيب يا حميد، أتممت عامك الستين بس مكبرتش علشان أنت you will always be forever young.