هى وكارولين..!!

سابو بعض إمتى.. ؟؟ وبعد كل الحب ده مش ممكن.. !! لاااااااا أنا مش هاقدر استنى لبُكره عدِّى علىَّ حالا.
بعد 15 دقيقة يدق جرس الباب..
ممكن أعرف إمتى وإزاى وليه ؟؟
آخد نفسى... وبعدين مالك واخده الموضوع جد كده لاهم أول من انفصل ولا آخرهم.. زى أى اتنين إيه أى اتنين لاااا أعترض دول كانوا الحب ودى كانت ناقص تشيله من على الأرض شيل وهو كان يتمنى لها الرضا ترضى إيه إللى حصل.. ولا حاجة عادى..
أكيد خانها وضبطته متلبس أو اتجوز عليها وفاعل خير قال لها.. ولاّ دخلت لقيته فى وضع مخل على النت..!! ردى متسكتيش كده.
ولا حاجة من دى.. الموضوع ببساطة من حوالى شهرين معرفش مين أقنعها بالفكرة السودة دى إنها تخبى حاجته لما تبقى بره البيت عشان يعرف إنه ميقدرش يعرف حاجة من غيرها.. وعملت كده !!
بالحرف كل ما يخصه خفته اللبس المفاتيح أوراق الشغل ونزلت وقفلت الموبيل دى مجنونة بقى وبعدين
اعتذرت له وافتكرها تهريجه وخلاص لكن الموضوع اتكرر كتير لما بقت خناقة وزعيق بس معقولة البيت يتخرب عشان كده..
لاااااااااا دى كانت أول نصيحة.. صاحبتها قالت لها جوزك مهتم بنفسه أكيد فى حاجة إنتى ليه مش بتعدى عليه فى الشغل لازم يحس بوجودك
إيه شغل ؟!!! هاتعدى عليه فى قسم البوليس بلبسها ده؟!
شفتى وانتى عارفه هى بتلبس إيه واحدة مبقلهاش خمس سنين فى مصر بعد عمرها كله إللى فى إنجلترا جت وحبت واتجوزت.. المهم راحت وكانت ليلة ما يعلم بها إلا ربنا بس برضه ده ما يوصلش للطلاق..
الحقيقة إللى حصل فى الكافيه هو إللى ولع الدنيا لما جوزها زهق وطق من تصرفاتها حب يفهمها إنه ممكن يضيع منها بسبب النصايح السودة قال يعلمها الأدب..
هه وعمل إيه ؟؟
ابداً قال لها بحبك يا كارولين..!! كارولين مين
معرفش هو ده الاسم إللى جه على باله زى ما حكى لإبراهيم جوزى وحصل إيه بعد كده ؟؟ لما لاقاها مش فارقة معاها زودها شويتين راحت قايلة له بطل بقى يا هانى.. مين هانى ده.؟؟
أخو كارولين.. أى اسم
طيب وبعدين إيه إللى وصل للطلاق ؟؟!!
أبدا شوية وبصوا لقوا صاروخ متحرك على الأرض قمر قربت منهم وراحت واخده جوزها بالحضن وهى بتقوله مش معقول إنت فين أسبوع معرفش حاجة عنك معقولة لحقت تنسى كارولين...؟