آاااااااه وآااااااه من الفيس بوك!

حديثة عهد أنا بهذا الاختراع وحاولت قبل أن أدخل هذا العالم الجديد أن أتعرف عليه وبدأت في البحث عن معني فيس بوك أي وش الكتاب أم ربما يقصدون إن ده كتابي وعليه وشي أي وجهي أي كل ما يتعلق بي ؟! المهم وضعت صورتي كما رأيت الجميع يفعلون وحاولت أن أختار صورة معقولة وكتبت بعض الأمور المتعلقة بي من أنني متزوجة وخريجة القاهرة .. إلا أنني بعد فترة وجيزة اكتشفت أنني أقف في محطة مصر لا بل محطة للعالم كله من كل لون ومن كل صوب وناس تتحدث بكل اللغات والأجمل أن هناك لغة خاصة يفهمها أصحاب وش الكتاب القدماء !!. ومع الوقت تعلمت أن أخفي صوري لأنني فوجئت بأن أناسا من كوالالمبور بيعلقوا عليها.. الأهم من ده كله اكتشفت أن الناس بتحط معلومات غلط في غلط بدءًا من السن والتعليم وجنسه أقصد(رجل ولا أنثي) وطبعا ده عرفته لما بصيت علي ما يتعلق ببعض زملاء الدراسة ووجود كم من الشهادات والزمالات الوهمية .. وبصراحة لم أرفض أي دعوة لضم الأصدقاء البكيين ووصل عدد أصدقائي إلي ما يقرب من ألف وجه معي!
في البداية لم أكن أجد وقتا لهم ولا أعرفهم بل مجرد صور...!! فقررت أن أصنفهم وجه 1 ووجه 3 ثم فرقت بين الرجال والنساء والحلوين والجذابين واللي نص نص واللي كلامهم حلو، أما الباقي من المناضلين وأصحاب الآراء والأفكار فلم يستوقفوني بالمرة! أصلي زهقت من التركيبات دي.
وانحصر الفيس بوك في عشرين شخصية تجيد الغزل وفن الحوار ! لا تندهشي وتفتحي فمك هكذا فأنا صريحة جدا نعم إنهم يجيدون الغزل والحب وأسعدتني كلمات الغزل، وأيضا المتابعة البوكية نسبة إلي الفيس بوك إضافة إلي كم الرسائل التي أتلقاها من الولهانين والمنتظرين في طابور المحبة.
وهل أسعدك هذا؟! (ده انا اللي بسأل)
أمتعني وأشبعني إلي أن حدث ما حدث، تصوري وبعد حورات طويلة وهيام وغرام وغزل اكتشفت أن فريدة صاحبتنا من أيام الجامعة دخلت عندي تحت اسم وهمي ولوجه رجل جذاب حاجة كده عمر الشريف علي توم هانكس تركيبة لاتقاوم وهاتك ياغرام وحب وفي الآخر اعترفت لي بالمقلب ده! وقعت من علي الكرسي ضاحكة (ده انا برضه)
وبعدين عملتي إيه ؟!
ولا حاجة بقيت أشك في كل حد وحسيت إني انضحك علي ومبقتش عارفة مين دول يا تري اللي كنت بتبسط معاهم وأحكي أخباري ما يمكن يكون جوزي ولا أخويا ولا حتي ابني حد عارف أصلي ساعات كنت بدخل عندهم متنكرة عشان أشوف بيعملوا إيه ؟ بس الغريبة أنني لم أتوقع أن أقع في الفخ ده رغم إني عارفاه؟
عندك حق تصوري بتفكري (ده انا برضه) المهم عملتي إيه؟
أبدا غيرت اسمي وصورتي وشهادتي وتحت صفحة جديدة ووصل عدد الأصدقاء إلي ألف تاني وصنفت المنضمين والمنضمات وطول النهار بسمع كلام غزل وإعجاب المهم إني مش أنا يعني مفيش مشاكل! ومش مهم يكونوا هم كمان صادقين ولا كذابين أهم حاجة إني باشبع ذاتي من الملاحقات العاطفية وطوابير الولهانين وأهو الواحد بيتسلي والأيام بتعدي أهي حاجة ألطف من المسلسلات خصوصا إني هنا البطلة..! وتركتني واتلهت بوجه من وجوه الكتاب .... عفوا الفيس بوك.