فنتازيا .. صباحية مباركة

طقت في مخه ونواها.. لازم ياخد له واحدة سبور أمورة حلوة يا محلاها.. تشبه ملامحها ديمي مور تسعد حياته وتملاها.. بستان محبة وهنا وسرور ويصحي «م» النوم يلقاها.. «ع» الصبح بتقوله بونجور وراح لأبوها يطلبها.. وافق بشرط يكون ميسور وعاش يومين يحلف بيهم.. وياها متهني مسحور شهر العسل أهو عدي وفات.. دي سعادته وأيامه بتدور يقولها اطبخي ملوخية.. تقوله ما عرفش يا مونامور يقولها اعملي فتة.. تعمله بسبوسة وبيتي فور يقولها اغسلي هدماتي.. تقوله ما اغسلش الكستور يقولها فسحة لطيفة.. تقوله ما اركبش الحنطور احتار معاها يكلمها.. من أقل كلمة تغضب وتثور تطلب وتتمنع دايما.. تلقاه يقول عبدالمأمور شغال يكافح في الدنيا. تقولش طور داير بموتور يجيب وينزح من بره.. «ع» الحال ده والله بقاله شهور من شغله يرجع متأخر.. تملي تلقي عشاه سحور وحاله يصعب «ع» الكافر.. والدم في الشريان بيفور وراسه «م» الهم اندار ولا عادش عارف تو من فور قرب خلاص يطفش منها.. وعايزله يجي عشرين دكتور يشوفوا حاله ومحتاله.. مكتوب عليه يموت مقهور دي مش جوازة دي جنازة.. وبكرة نيجي الخانكة نزوره.