دعم الأشقاء

عن حجم المساعدات التى قدمتها دول الخليج لمصر خلال السنوات الماضية، قال الرئيس السيسى: «مصر نجحت فى تحقيق مسيرة التنمية بدعم من الأشقاء فى الخليج؛ حيث تم ضخ عشرات المليارات من الدولارات فى الاقتصاد الوطنى». مشيرًا إلى أن دعم الأشقاء فى الخليج ساعد مصر على الاستمرار فى البناء والتنمية رغم التحديات.. قائلاً: «أموال سايلة ومشتقات من دول الخليج مكنتش هتكمل، ولمّا بقول كده بعترف بفضل الناس لو كان سابك مكنتش هتلاقى وقود، مش كان فيه طوابير؟ طيّب كانت معمولة ليه؟، طيب احنا غلطنا لمّا قمنا على الناس اللى كانت موجودة هقولك لأ.. سفن المشتقات والغاز اتحولت من البحر المتوسط والأحمر إلى الموانئ المصرية كل شهر، اللى ميعترفش باللى اتعمل معاه يبقى مش كويس، ولازم نقول ده طيب لو مكنش اتعمل؟ رُدّوا عليّا؟ هتستحملوا؟.. بكلم المصريين هتستحملوا؟، مش انتوا اللى اتحركتوا؟.. خلاص استحملوا بقى.. لكن لأ.. الأشقاء وقفوا وقفة كبيرة جدًا مع مصر، أكتر من 18 شهر المشتقات بتيجى بدون مقابل.. طيب لو فيه مقابل كنت هتقدر تسدد؟.. لا دولار معاك ولا جنيه.. لأنك كنت بتبيعها بأقل من تكلفتها بنحو 40 %.
وواصل الرئيس السيسى: «بقول الكلام ده لينا انت بتتكلم خلى بالك هتبقى شايل وزْر كبير قوى لمّا تخربها، وبرضه خلى بالك وأنت بتعمّرها وتبنيها تاخد أجْر كبير قوى.. الأجْر مش منّى أنا ولا التاريخ ولا الكلام الجميل اللى بيتقال، إذا كنا مؤمنين بالله سبحانه وتعالى فالأجر من عند الله، وأتمنى أن يكون لينا أجر عنده أو يقبل ويرضى على اللى احنا عملناه.. فلو مكنش ده متعديش عليها كده.. علشان يجيلك البترول والغاز وبرامج أخرى علشان بقية السلع وبرامج أخرى علشان مبادرات تخفف الأزمة فى مصر، ممكن حد يقولك ليه كده؟ علشان هو كده.. متحبوش تسمعوا الحقايق ولّا إيه؟، وعلشان تعرفوا إنكم عاوزين تعرفوا تشتغلوا وحريصين ومتسمعوش كلام حد عاوز يخربكم.. علشان يخربكم والله العظيم، ولمّا يخربها يولعها ما هُمّا يا عينى يا ريت يقولوا نبنى.. تبنى إيه يا راجل؟ وأكمَل الرئيس: «عشرات مليارات الدولارات تم ضخها فى الاقتصاد فى الوقت ده ولو مكنش اتعملوا، وأزمة تدخلنا فى أزمة والبلد تضيع» هقول كلمة تانية.. طيب أنا عندى أزمة ومشكلة هتتخلوا عنّى؟ أنا بكلم المصريين هتتخلوا عنها؟.. هتسيبوها يعنى؟.. هتقولوا زى ما قالوا كده لسيدنا موسى: «اذهب أنت وربك فقاتلا».. ولّا إيه؟ لمّا اتكلمنا مع بعض فى 2013 قلتلكم على الحقائق الموجودة وإن ده مش هيبقى جهد حكومة ولا جهد قيادة ده جهدنا مع بعض كلنا نشيل علشان نعدّى كلنا على فرض إن اللى بيتقال حقيقة ندى ظهرنا ولّا نقف مظبوط عليها ولّا لأ، بقولكم كده علشان موضوع مهم علشان تحط كتفك فى ظهر بلدك فى كل وقت مش فى ظهرى ولا ظهر الحكومة لا.. لا.. ضهر بلدك اللى أنت عايش فيها وحلمك فيها اوعى تضيّع حلمكم واوعى يحبطك حد. ووجَّه الرئيس السيسى الحكومة بسرعة الانتهاء من مستندات التحصيل فى أسرع وقت؛ بهدف تشجيع المستثمرين والصناع، وعدم تعطيل العملية الإنتاجية، كما وجَّه بتنظيم مؤتمر اقتصادى نهاية الشهر الجارى لمناقشة الأوضاع والآراء الاقتصادية ومستقبل الاقتصاد المصرى، بمشاركة المستثمرين ورجال الصناعة ورجال الاقتصاد أصحاب الآراء المعارضة.