للصعيد رئيس يبنيه

نقلة كبرى شهدها صعيد مصر، مؤخرًا، بعد سنوات من التهميش، لتأتى افتتاحات المشروعات القومية ضمن فعاليات « أسبوع الصعيد»، توثيقا لحجم الإنجاز والعمل فى الجمهورية الجديدة.. ليكتب الرئيس عبدالفتاح السيسى شهادة ميلاد جديدة تحقق نهضة تنموية وخدمية متكاملة لأهل الصعيد.

واستمراراً للافتتاحات الرئاسية ضمن أسبوع الصعيد, زار الرئيس مجمع بنبان للطاقة الشمسية بمحافظة أسوان، وافتتح عدداً من المشروعات بمحافظات الصعيد المختلفة.

حوار أبوى فى أسوان

ووجه الرئيس خلال كلمته الشكر إلى الدكتور محمد شاكر وزير الكهرباء لجهوده فى ملف الطاقة والكهرباء.
وأكد الرئيس أن قطاع الكهرباء شهد ظروفا صعبة فى الدولة المصرية قبل البدء فى تطويره بشكل كامل.. وتابع: نقدر نعمل ربط كهربائى مع دول الجوار.. ظروفنا فى 2013 و2014 قبل كده مكناش هنقدر.. العالم رايح لكده.. الدولة اللى مش هتكون جاهزة هيفوتها الربط الكهربائى وده لمصلحة البشر والشعوب.. لازم يكون عندك ربط وتتبادل الاستفادة .. ولازم يكون قطاع الطاقة أو الكهرباء من أرقى ما يمكن.. ولذلك أوجه التحية والتقدير إلى الدكتور شاكر ووزارة الكهرباء.
وقال الرئيس: إن الاستثمارات فى الصعيد خلال الفترة الماضية تخطت تريليونا و100 مليار جنيه .. ولسه شغالين.
قال الرئيس: «إن مشروع حياة كريمة فى محافظات الصعيد يضم أكثر من 30 مركزا، متابعا: «معرفشى اللى هقوله مناسب.. هل ممكن العدادات اللى هنعملهم فى مراكز حياة كريمة.. ال 34 مركزا تكون العدادات مسبوقة الدفع.. لما أعمل خليت المواطن شايف الاستهلاك.. فيه ناس اشتكيت أن القراءة مش مضبوطة.. العداد معاك وانت اللى بتشحنه بدون قراءة.. انت تنظم استخدامك للكهرباء».

.. مع أطفال غرب سهيل

وأضاف الرئيس: «يا ريت عداداتنا فى الدولة المصرية تكون مسبوقة الدفع.. علشان مشكلة الشكاوى من القراءات.. لو ده ممكن يبقى نعملها».
وقال الرئيس: «لما باتكلم مع الناس يقولوا الكهرباء غالية علينا، صحيح، هى غالية لكن مش عاوزين نغليها عليكم.. أحب كل واحد ياخد حقه، أنا وفرت لك خدمة..حوكمة إجراءاتنا اللى احنا بنعمله نستهدف منه تحصيل ولا لأ؟ لو مش بنحصله هايبقى فيه عجز مش هتقدر الدولة تتحمله.. دولة ذات شأن وننمى انفسنا وندى فرصة للقطاع الخاص والصناعة إنها تنمو وتستقر، ولو مفيش كهرباء المصانع هتقفل مصانعها والعمالة هاتبقى بره والبلد دى هتتهد وقلت الكلام ده للدكتور شاكر».
وأكد الرئيس، أن المشروعات الجديدة التى يتم تنفيذها فى محافظات الصعيد يعمل فيها شباب الصعيد، قائلاً: «المحطة الجديدة بتاعت الطاقة الشمسية بيشغلها القطاع الخاص.. وأهل الصعيد أولى للشغل فيها».
دعم الصناعات الحرفية ب 200 مليون جنيه


غرب سهيل
وقام الرئيس بزيارة قرية غرب سهيل بمحافظة أسوان لتفقد اعمال تطوير الخدمات بالقرية فى اطار مبادرة حياة كريمة، وأثنى الرئيس على كرم أهل النوبة وحسن ضيافتهم، وأشار إلى أن الدولة بجميع أجهزتها حريصة على دخول الخدمات الأساسية لمركز أسوان بالكامل. وقال الرئيس إنه جارٍ العمل حاليا فى 52 مركزا فى 20 محافظة ضمن المبادرة الرئاسية (حياة كريمة)، بالإضافة إلى مركز أسوان الذى تم إدراجه مؤخرا تنفيذاً لتوجيهات الرئيس بعد زيارته لقرية غرب أسوان.
وتضمنت جولة الرئيس، المرور على السوق السياحي، واستقبل أهل غرب سهيل الرئيس بالاحتفالات التى شملت أغانى تراثية نوبية، وعروضاً من أطفال القرية، وتفقد الرئيس السوق التجارى حيث قابل مجموعة من أصحاب المحال السياحية والتجارية ومحال الصناعات اليدوية والحرف التراثية.
كما حرص الرئيس على عقد لقاء مفتوح مع مجموعة من أهالى القرية للاطمئنان على أحوالهم و تناول وجبة الغداء معهم، وفى نهاية الجولة وجه الرئيس الدعوة للطفلة (جنى) التى استقبلته فى مرسى جزيرة كيكى مع الطفل (ساجد) لحضور النسخة الرابعة من منتدى شباب العالم.


حرص على التطوير والإرتقاء بقطاع الطاقة والكهرباء

اليوريا والسكك الحديد
وتفقد الرئيس، مصنع اليوريا ونترات الامونيا بمنطقة كيما بمحافظة أسوان.. كما تفقد محطة سكك حديد أسوان، حيث شهد تدشين الوحدات المتحركة الجديدة بمختلف أنواعها من قاطرات وعربات السكك الحديدية.
ووجه الرئيس، التهنئة للحكومة وقطاع الأعمال على افتتاح مصنع كيما ومحلج الفيوم المتطور.. وقال: «أهنيكم.. قطاع الأعمال والحكومة على المشروع ده والافتتاحات سواء مصنع كيما ومحلج الفيوم».
وأضاف الرئيس: مش هنسى شاب قالى مصنع كيما بيرمى مخلفات فى النيل وعملوا حاجة علشان الريحة متطلعش.. وخدناه وروحنا وقولناله احنا شغالين فى ده وهنعمله».
وقال الرئيس: «الوزير بيقول بعنا الأرض علشان ناخد قروض.. بعنا الاراضى علشان ده ونجيب جزء من الفلوس.. مش عاوزين نرجع تانى للخراب والمصنع ده بعد شوية يرجع يتدهور تانى».
واستعرض الرئيس بعض أوضاع الدولة خلال السنوات الماضية قائلاً: «لن انسى عام 2011.. والمفروض يا مصريين مش تنسوا العام ده.. كل إجراء وخطوة مش تنسوا العام ده.. اللى أنقذكم ربنا وحده.. وربنا اللى أنقذ البلد دى من مصاير الخراب والدمار.. ولأجل خاطر ال 100 مليون مصرى».
وأضاف: «ربنا انقذ البلد دى علشان البسطاء والغلابة.. لحكمة إلهية وربنا انقذها.. وهل هنكرر نفس المسار تانى.. لا طبعا.. الكلام ده لو هيزعلكم انا هاجى عليكم.. علشان خايف على البلد..مش تزعل إلا على نفسك وانك ممكن تكون سبب فى دمار بلدك وخرابها».
وتابع أن المصانع الجديدة يجب أن يتوافر لها عناصر النجاح بشكل كامل، قائلا: «أنا عاوز فرص نجاح للمصانع والشركات الجديدة منعا لتكرار اللى فات، أى مستثمر أو قطاع خاص لما بيعمل مصنع جديد مش بيكون عنده مشكلة فى تحديث العمل داخل المصنع ده.. لأنه قاعد بيدير صح.. الإدارة الجديدة مفيش فيها خواطر.. مش هعين حد فى المصنع ملوش لزمة.. علشان قريبى أو معرفتى».
واستكمل الرئيس، القطاع الخاص شريك معانا.. هيدفع ويبقى معانا بفلوسه بقى.. بتوع قطاع الاعمال هيزعلوا منى.. انا بتكلم فى مصلحة أكبر.. بتكلم فى مصلحة البلد.. انها تعيش وتكبر.. البلد تعيش وتكبر وتبقى المصانع عبارة عن أداة فى الاقتصاد ورفاهية المجتمع.. ده مش هيحصل إلا لما تبقى منضبط فى التعيين والتشغيل».
وتابع الرئيس: «بقولكم وكل زمايلنا اللى فى شركات قطاع الاعمال ممكن يختلفوا معانا.. يقولك لأ إحنا بندير كويس أرد عليك وأقولك بامارة إيه؟ بأمارة مجالس الإدارة اللى فلوسها بالكوم.. على الهواء بتتكلم كده؟ آه طبعا ..لا بخاف ولا بيهمنى إلا البلد بس، لكن مبخفش من حد خالص.. العمر بتاع ربنا والمكان بتاع ربنا وقت ما يقولى يلا أعظم وامشى».
وواصل الرئيس السيسى: «إدارة القطاع العام والحكومة ليست ذات كفاءة ولا تحقق النجاح المطلوب.. ممكن تحقق نجاح لكن النجاح ده فى مصر وظروفك الاقتصادية مش عاوز نجاح عاوز تفوق وقفز.. مينفعش تقولى حققت 5 او 10 %».
وأكد الرئيس أن كل إجراء للتصويب والإصلاح لا يمكن يكون على حساب العمال.. العامل ملوش ذنب.. وبالتالى مفيش إجراء إلا بنأكدعلى حقوق العمال.. الدولة فقط تتحمل التكلفة.. ومش العامل.. اهل الشر بياخدوا الكلام وبيعملوا عليه حاجات تانية.
وشدد الرئيس على ضرورة اتباع النظم الحديثة فى الزراعة لزيادة الإنتاج فى الفدان وبالتالى يزود الدخل والإنتاج.
وقال السيسى، إن الدولة لم تقترب من سعر تذكرة القطارات إلا بعد التطوير الكامل وتابع: «قولت يا كامل متقربشى من سعر التذكرة إلا لما تحدث العربيات.. وكل قطارات مصر مفيش عربية ولا جرار جديد.. ومفيش على السكة كلها.. القاهرة والإسكندرية وأسوان وبورسعيد.. مفيش قطار واحد قديم.. مفيش على أى خط فى مصر عربية قديمة».
وأضاف: «طب ما الوزير يشيلها أو رئيس الوزراء يشيلها.. انا عاوز يوم القيامة ربنا يشيلنى كل حاجة عملتها.. علشان كده بقول دلوقتى.. بنحط أسس لدولة جديدة كما نتمنى ونأمل.. قطاع النقل وصل إلى 1.7 تريليون جنيه.. يعنى 1700 مليار جنيه.. بقول الكلام ده للمصريين علشان محدش وهو بيكلمكوا يقولكم السكة الحديد تعبانة ليه؟.. أصل الحكومة مكنتش كويسة.. لا.

«بنحبك ياريس» هتاف خلال حفل التكريم

وشدد الرئيس على أن الدولة المصرية تحتاج إلى موازنة «تريليون دولار»، من أجل توفير الإنفاق المطلوب، متابعا: «إحنا دولة عددنا عاوز تريليون دولار موازنة.. الموجود منه 3 تريليون جنيه.. 14 تريليون جنيه يتجابوا منين.. لو مش هيتاجبوايحصل انهيار وضغط على المرافق .. لما نزهق نطلع نهدها.. ومحدش يطلع يقول الناس بقت مهجرين والبيوت خربت.. والناس تترمى فى البحار.. البلد مبتطلعش كده.. بتطلع بالمتابعة الدقيقة والإصرار والعناد.. محدش هيعيا من الجدية والهم لأن ربنا هيحميك.. اللى يهتم بالناس ربنا ميحمهوش؟ لا.. هيحميه ويحافظ عليه ويقويه طول ما انت بتجرى على الناس.
أسوان الجديدة
كما افتتح الرئيس مدينة أسوان الجديدة، وتفقد كورنيش المدينة ومنطقة الاسكان والفيلات.. فضلا عن معرض الحرف اليدوية والتراثية . ووجه الرئيس، بتخصيص عائد 200 مليون جنيه من صندوق تحيا مصر لصالح دعم الصناعات الحرفية.
وأكد الرئيس أن مبادرة «حياة كريمة» ستغطى جميع القرى خلال 3 سنين، مضيفا: «خدنا أول تلت اللى هو أصعب حاجة هاتقولى فيه حاجات صعبة هقولك اللى احنا اخترناه كان أصعب».
وافتتح الرئيس عبر الفيديو كونفرانس، المرحلة الأولى من مدينة غرب قنا، ومدينة ناصر غرب أسيوط، والإسكان الاجتماعى بمدينة قنا الجديدة، ووحدات سكنية بمدينة جنة بالمنيا الجديدة، ووحدات إسكان اجتماعى بأسيوط الجديدة، وإسكان اجتماعى بعدد 2040 وحدة سكنية بمدينة المنيا الجديدة.
وعلق الرئيس، على وقف البناء قائلا: هنقعد 10 سنين الدولة تبني، وماتسمحش لحد يبنى تانى لغاية ما نعمل آليات منضبطة بشأن التراخيص وغيره.
وأكمل: «قلت هعمل 100 ألف شقة إيجار بفرشهم.. خش يا عريس ويا عروسة فى الشقق اسكن وادفع إيجار.. وهعمل ده.. ولكن حرام نحط فلوسنا يا مصريين فى مبانى لا نستفيد منها».
وفى ختام أسبوع الصعيد شهد الرئيس السيسى عدداً من العروض الفنية، على المسرح الرومانى بأسوان الجديدة.
وتفاعل المشاركون فى الحفل، وهتفوا جميعهم قائلين: «بنحبك يا ريس والله بنحبك يا ريس»، وهو ما دفع الرئيس السيسى للرد عليهم، قائلاً: «وأنا والله بحب كل المصريين».