ما أعرفش إيه الوضع دلوقتى، بس خلال الفترة من 2005 ل حد 2011 كان الناشرين والموزعين المصريين الصغيرين عايشين على شوية كُتب هى الأكثر توزيعًا من بينها كتاب «كفاحى» بتاع أدولف هتلر. الظاهرة دى كانت غريبة جدّا علىّ، مكنتش فاهمها خالص، ول حد دلوقتى مش قادر أفهمها، ليه المصريين مقبلين على الكتاب دا تحديدًا، بس العجب يزيد لما تعرف شوية عن تاريخ الكتاب، اللى اتنشر من 92 سنة. ناس كتير فاكرة إن دا مذكرات هتلر فى أواخر حياته، إنما الواقع إن هتلر كتب الكتاب دا خلال فترة سجنه، بعد ما كان ب يدبر ل انقلاب على الحكومة، الانقلاب فشل، اتنشر سنة 1925، قبل ما هتلر يمسك الحُكم ب سنين طويلة. ب التالى، الكتاب مفيهوش أى حاجة عن حُكم هتلر، ولا أى حاجة تخص الحرب العالمية التانية، ولما حاولت أقرا نسخة من الكتاب لقيت صعوبة شديدة، نتيجة استغراقه فى الشأن الألمانى بعد الحرب العالمية الأولى، وأنا يعنى مش دايس أوى، ف فيه حاجات كتيرة مكنتش فاهمها، إضافة إلى إنه مش مذكرات ب المعنى المفهوم، ل إنه ب يستخدم المذكرات ل شرح أفكاره، اللى محتاجة شغل كتير ل استيعابها، نتيجة بُعد السياق عننا تمامًا. ف إيه بقى اللى يخلى المصريين يقبلوا على كتاب زى دا. اللى اكتشفته كان حاجة لطيفة جدّا، هى إنه تقريبًا ولا كتاب من اللى ب تشوفهم على الرصيف، ومكتوب عليه كفاحى، هو فعلاً كتاب «كفاحى» الأغلب إن الكتاب (اللى ع الرصيف) ب يبقى فيه فصل ولا حاجة من الكتاب (بتاع هتلر)، الباقى كلام شعبى عن هتلر أو منسوب ل هتلر خصوصًا علاقته ورأيه فى اليهود. نُسَخ كتيرة من اللى الكتب اللى ب تتباع ب اسم «كفاحى»، هى فى حقيقتها مجرد كلام جَمعه مؤلفين مجهولين ما كتبوش اسمهم، ب يخاطبوا النزعات الشعبية عند القراء، ويفرّغوا رغبة دينية فى الهجوم على أتباع ديانة تانية، من الطبعات دى ظهرت مقولات كتيرة اتنسبت ل هتلر، ولما ظهر الفيسبوك تحوّلت إلى كوميكس وأقوال الناس عايزين يقولوها، بس تحت اسم «هتلر». مِسكين هتلر.• نادرة ال «مش شامية» بص هو فعلاً من حق أى حد ينخدع فى شكلها وستايلها والطريقة اللى ظهرت بيها وتفاصيل كتير فى حياتها الفنية (أهمها أم كلثوم) ف يعتقد إنها من الشام وفيه ناس كتير كمان ب يسموها «نادرة الشامية» إنما يعنى لما تدور شوية صغيرين تعرف إنها من عابدين يا فضائيين «مصطفى أمين الشتاوى» دا اسم أبوها كان عايش فى عابدين وسط أسرة جاية من البحيرة بس هو مكنش طوع الأسرة راح اتجوز واحدة أصولها لبنانية على غير رغبتهم وخلّفوا بنت اسمها نادرة اتولدت 17 يوليو 1906 فيه حاجة حصلت بعد ميلاد البنت حاجة غامضة تضاربت فيها الأقوال بس نتيجتها إن البنت الرضيعة بقت فجأة من غير أب ولا أم المؤكد إن الأم ماتت والأب هاجر والطفلة اتربت مع عيلة أبوها فى عابدين لكنها كانت عبء عليهم هم تحمّلوها ب اعتبارها «لحمهم» إنما كانوا مستنيين بس إنها «تبلغ» مجرد ما وصلت 13 سنة جوزوها ل أول عابر سبيل ما استحملتش معاه ست شهور وهربت هربت منه ومنهم ومن الكل كليلة ف طلقها طبعًا هى اتعلقت ب الطرب اتعلمت تغنى وتلعب عود وتلحن السميعة ومحبى الأغانى القديمة يعرفوها كويس وغالبًا غالبًا ب يحبوها مطربة وملحنة ما كملتش عشرين سنة وكانت احترفت وبدأت تغنى غنت على مسرح رمسيس أول ما بدأت السينما غنت ومَثّلت فيها يعنى هى بطلة فيلم «أنشودة الفؤاد» اللى فيه خلاف إذا كان أول أو تانى فيلم مصرى نجحت نادرة بس اتعرفت فى الوسط الفنى ب اسم «البت الشامية» الاسم دا طلّعته عليها أم كلثوم ومكنتش تذكر اسمها نهائيّا طول التلاتينات والأربعينات كانت نادرة نجمة معروفة ومن مطربات الصف الأول فى الإذاعة وملحنة معتمدة فيها ولما كانت تغنى ع المسرح كانت تقود التخت وتعزف هى العود وكانت محل اهتمام ورعاية شوقى بيه لكن بعد 1952 ظهر جيل جديد ومش كتير اللى صمدوا من مطربى ومطربات التلاتينات والأربعينات جيل كامل اتدشت فتحية أحمد، عباس البليدى، إبراهيم حمودة وهى وغيرها غيرهم كانوا ملء السمع والبصر أو السمع بس ثم اختفوا ومحدش بقى يتابع شغلهم ولما شغلهم وقف ما بقوش يتابعوهم هم شخصيّا ولما كان الواحد منهم يموت كان يبقى محظوظ لو اتنشر عنه خبر 100 كلمة عنوانه «وفاة الفنانة نادرة» ربنا يرحمها بقى ويرحم الجميع.• الكنال لما نابليون جِه مصر كان معاه ناس مهمين آخر حاجة لعبوا أدوار كتيرة فى تاريخ مصر حتى بعد ما الفرنسيين سابوا مصر 1801 يعنى تقدر تقول إنهم ما مشيوش بعد التلات سنين اللى قعدوهم جايز ما بقاش فيه وجود عسكرى إنما وجودهم كان له أشكال كتير مثلاً كان معاه دبلوماسى اسمه ماثيو ماثيو دا قدر يعمل علاقات كويسة مع رجال الأزهر ومع قادة عسكريين ومع أى حد له كلمة مسموعة فى مصر لما نابليون مشى ماثيو ما مشيش فورًا قعد شويتين خلالهم استشف إن فيه قائد عسكرى مؤكد ه يبقى له شأن كبير فى المرحلة الجاية اسمه محمد على ف قرب منه واتصاحبوا ب حيث لما بقى صاحبنا والى مصر كان ماثيو من المهمين عنده بعد شوية ماثيو ه يسيب مصر ويسيب فيها ابنه فرديناند فرديناند ديليسبس الراجل اللى ه يعتمد عليه السيمونيين فى إنه ياخد الموافقة على حفر قناة السويس مين السيمونيين؟ دى جماعة كان ليها دور فى حركة السياسة العالمية ماهيش حاجة سرّية ولا نظام ماسونية وكدا أساسًا العالم كله كان فيه جماعات شبيهة تساعد على الاشتعال ولا تشتعل دورها يتخطى الأحداث الآنية ل التفكير فى اللى جى إنفانت واحد من السيمونيين اللى اشتغلوا على مشروع قناة السويس كَتب: علينا أن نجعل مصر، هذه العجوز الشمطاء، طريقًا يصل أوروبا بالهند والصين، فمعنى هذا أننا نضع إحدى قدمينا على نهر النيل، والأخرى فى بيت المقدس، وتصل يدنا اليُمنى إلى مكة، وتلمس باليد الأخرى روما، مُتكئة فوق باريس، اعلم يا صديقى أن السويس هى مركز حياتنا وكفاحنا، ففى السويس سنُحقق مشروعًا طالما انتظره العالم، ويُبَرهن على أننا رجال ديليسبس حاول مع محمد على ومحمد على رفض قولاً واحدًا قال له: مش عايز بسفور فى مصر البسفور دا مَضيق فى تركيا مجرَى ملاحى مهم جدّا ف ب سببه فيه نزاعات دولية وتدخلات من الدول الكبرى ف إذا كان الباب العالى عنده كدا فى مصر ه يحصل إيه؟ فرديناند ما يأسش بعد محمد على حاول مع ولاده ل حد ما خد الموافقة من سعيد وبدأت أعمال الحَفر يوم 16 يوليو 1856 بس يا سيدى وعنها.•
