«نفسى أنجح زى محمد صلاح»

تعتبر إحدى نجمات فريق الطيران للسيدات المتوج بلقب الدورى موسم 2018/19، نورهان عمرو چوكر الفريق متعددة المواهب تمتاز بالقوة والسرعة والمهارة العالية، عنصر أساسى رغم صغر سنها، ولكنها تمتلك من الخبرات ما يكفى لتحمل المسئولية، سوف تتخرج من تجارة خارجية السنة القادمة، وتحاول أن توفق بين الدراسة الجامعية وممارسة كرة القدم، نورهان فتحت قلبها ل«روزاليوسف» لتتحدث عن أمور كثيرة، نسردها فى هذا الحوار:
■ فى البداية عرفينا بنفسك؟
- نورهان عمرو .. 22 سنة، بلعب فى نادى الطيران ومنتخب مصر.
■ كيف كانت بدايتك مع كرة القدم؟
- بدأت لعب كرة وأنا عندى 6 سنين وكنت بلعب فى الشارع والمدرسة.
■ من الذى ساعدك فى ممارسة اللعبة؟
- والدتى اللى ساعدتنى ف كل حاجة.
■ ما الصعوبات التى واجهتيها فى بداية مسيرتك؟
- الصعوبات هى زى أى بنت أهلى ماكنوش موافقين، والمجتمع مش معترف بأن البنت تلعب كرة ويبقى فى تريقة، و حاجات رخمة بس دلوقتى الموضوع أحسن شوية.
■ ما هو المركز الذى تلعبى فيه؟
- أنا بلعب فى أى مركز .. تقدر تقول چوكر.
■ ماذا عن الموسم الماضى مع نادى الطيران؟
- الموسم الماضى كان من أصعب المواسم اللى لعبناها، وعشان كنا قد المسئولية وكنا بنموت نفسنا عشان نأخد الدوري، وحصلنا عليه بالفعل الحمد لله.
■ ما كان شعورك بعد الفوز بلقب الدورى؟
- كان أحلى شعور طبعًا إحساس ميتوصفش، إنك تكون بطل الدورى رغم إنه كان من أصعب المواسم.
■ ما أصعب المواقف التى مرت عليكى وعلى الفريق ككل؟
- المواقف الصعبة هى أن كان بيبقى فى إصابات كتير فى ماتشات مهمه، وكمان أحسن لاعبة فى مصر «هيام عبدالحفيظ» (اوشا) جالها صليبى فى أول الموسم فى مباراة وادى دجلة، و كانت دى أصعب حاجة مرينا بيها عشان دى أحسن لاعبة فى الفريق عندنا، و أحسن لاعبة فى مصر، وعدم وجودها كانت حاجة مؤثرة جدًا.
■ هل تحلمين بالاحتراف الخارجى؟
- أه طبعًا بحلم باللعب برة بس مش سفر وخلاص، ومش عايزة أسافر عشان اتمنظر و أروح اتصور و أخد شو وبعد كده أمشى عشان مستويا وحش زى ما فى بنات من الكرة حصل معاها كده .. أنا عايزة أروح ألعب وأثبت نفسى و أعمل حاجة لبلدى زى محمد صلاح كده أنجح نفس نجاحه.
■ ما طموحاتك خلال الفترة القادمة؟
- طموحاتى الاحتراف ولو مفيش نصيب يبقى هفضل أقاتل وأجتهد عشان فريقى وعشان الدروى ميطلعش تانى من بيته.
■ من هو مثلك الأعلى محليا وعالميا فى كرة القدم؟
- مثلى الأعلى محمد أبوتريكة.. وبره مصر ليونيل ميسي.
■ ما العوامل التى تساعد كرة القدم للسيدات على التطوير؟
- حاجات كتير وأهمهم الإعلام و قلنا كده 100 ألف مرة.
■ هل انتى متزوجة؟
- لا أنا مش متزوجة.
■ ما مواصفات التى تتمنيها فى شريك حياتك؟
- مفيش مواصفات معينة هو أهم حاجة يكون راجلا محترما وبيعرف ربنا.
■ كلمة أخيرة تحبى تقوليها؟
- أحب أقول شكرًا جدًا على اهتمام المؤسسة العظيمة «روزاليوسف» بالكرة النسائية.