(3) بيزنس مان

مواطن عصامي
ومن صغره غاوي
صيد الفرص وقعاد القهاوي
خبير في الموالسة
ودفع الرشاوي
يخلص في جلسة
وحبة ثواني
مصالح بتاخد معانا سنين
ضليع في علوم النفاق المتين
مجامل خبيث
بيعرف مصالحه ، ومابيختشيش
شديد الدماثة
وشغل الحساسة
تشوفه في جنازة
يعيط بحرقة
ولو حفل ساهر
بيرقص بجرأة
ويلعن في خاش الدنيا الغرورة
وعند الضرورة
يبيعك في ثانية
«ندل وخسيس»
مالوش سكة تانية ...
عصامي في كافة شئون الحياة :
ضعيف في المدارس
ماكملش خالص
ودايما يقولك معاه دكتوراه...
مريض بالأناقة
وحب الظهور
يقلوظ في روحه
ويطلق بخور
يشوف الأكابر يبوس الأيادي
وعقله يهاجر
ويركع ويسجد زي الحواة ...
كانت بدايته
عازف جيتار
ومرة قالوللي :
بياع فشار
وناس من زمايله
اللي كانوا معاه
كتبوا وقالوا في صحف المعارضة:
دا كان واد حلانجي
وأبوه كان لومانجي
وتاجر بشنطة
وهو بسلامته
سافر لمامته
من بيروت لمالطة وشال الأمانة
ووصلها طنطا
وعمل الخميرة...
وبعد جنابه ما كان ع الحصيرة
بني له عماره
وجات له البشارة
بعضوية دايمة
في حزب الحكومة
وقِبل العزومة
وأصبح مرشح ونائب كمان
وغير مراته ، أم العيال
وخد بت شقرا آخر جمال
ووضب له فيلا
وحمام سباحة
دا غير القصور
وشركة سياحة
وبقي من يومها
آخر بجاحة
ونضف فلوسه
وغسلها بسافو
وكل اللي شافوا..
صورته وهو بياخد وسام
قالوله: بكام؟!
88وندفع لمين؟!
ومن اللي يقدر يجيب القلادة؟!...
لذلك يا سادة
مفيش مستحيل
ولا أي حاجة
توقف نمو العصامي البسيط
وأنا، واللي زيي
مواطن..
ولكن
بدرجة عبيط
... فهذا العصامي
رأيته أمامي
وهو بيمضي موافقات في ثانية
أراضي ببلاش
وإعفاء ضريبي
ومصنع قماش
ومنجم دهب
ومصانع حديد
وأربع سفن
لنقل البضايع
وبعض الآثار
وأربع مراكب
فلايك كبار
لنقل الغلابة
اللي راحوا بلاش
لإن المراكب
خشب أبلاكاش
وواخدين موافقة
لأعالي البحار
وكافة حقوقنا
راحت في داهية...
ويمضي العصامي
موافقات جديدة
لتخصيص أراضي
وتسمين عجول
وأعلاف جاموسي
وفضائيات خصوصي
وقنوات أغاني
وصحف للوجاهة
واستيراد تقاوي
ده غير الزراعة
وشغل الكيماوي
وبساتين فواكه
وقريتين تلاتة
في شرم، ومارينا
وإحنا اللي متنا
في السويس وسينا
تعبنا وحاربنا وراحت علينا
لإنه بسلامته.. طبعا نسينا
وأدي احنا أهو
رحنا وجينا
وهو اللي باقي
يعلي في رصيده
ولاحد يقدر
ولا حتي فكر..
في مرة يصيده وزادت فلوسه،
بقت مليارات
ولسه بيبني سبع مشروعات
وكل الأراضي، كوش عليها
وأرض المعادي، مسح بيها زوره وقصر المنيرة
أضافه لقصوره
لحد الحكومة ما تدفع ديونه
... وأصبح وكيل (الكويز) في المتاجرة وتصاريح دخول
وتصاريح مغادرة
وأفلام عجيبة
وتهريب فياجرا
دي عالم شديدة
وجامدة وقادرة
دي عالم قوية
يا عمي وفاجرة
واحنا الغلابة
بقينا رقم ..
مجرد رقم
علي ورقة فاضية
نموت في الحوادث
وصهد الحروب
ويرمولنا زي الفراخ المصابة
شوية حبوب
ونشرب ونعطش
لإن التلوث بقي في كل حاجه
لذلك يا صاحبي
إذا كنت عارف هذا العصامي
بلاش والنبي، تكتب أسامي
واكتب حروفه كفاية ، ورموزه
لعل وعسي الزمان يحوجك
وبكرة تعوزه..
وربك يصون الوطن من صحابه