فوازير رمضان المصرية

بمناسبة الشهر الكريم نقدم لكم اليوم فوازير رمضانية ساخرة تتحدث عن شخصيات عرفها المجتمع المصري وحدد موقفه منها بوضوح.. وسوف تنشر «روزاليوسف» هذه الفوازير تباعًا ومن يتعرف علي الشخصية التي تتحدث عنها الفزورة يرسل لنا الحل علي عنوان الجريدة ويكتب علي المظروف «حل الفزورة» وستجري قرعة بعد العيد لتوزيع الجوائز علي الفائزين والجوائز كما يلي:
الجائزة الأولي: اشتراك لمدة سنة في جريدة روزاليوسف
الجائزة الثانية: اشتراك لمدة ستة أشهر
الجائزة الثالثة: اشتراك لمدة ثلاثة أشهر
يكتبها لكم: محمد بغدادي رسوم الفنان: حجازي
ح أقولكم كام فزورة
أصل وصورة
أهو منها بتسلي صيامك
طول رمضانك
ومنها تعرف معلومة
مش منشورة
في مجلتك أو جورنالك
عن نجمة كانت مشهورة
وعن سياسي مُتهور
وقع في حب السنيورة
أو عن مثقف متحرر، أو متغير
بيحب يقبض في الأول
ويقول حاجات مش مفهومة
أو عن صحافي صفراوي
تاه في الطريق الصحراوي
مسنود علي واحد تاني
مُتخفي تحت البنورة
أو برلماني كان غاوي
.. أكل عكاوي
استولي علي قصر، وناوي
ياخذ كمان المعمورة
أو عن ملوك تفصيل قوانين
طالعين واكلين..
نازلين واكلين..
لكنهم مش مقتنعين،
إن الحياة مش مضمونة
وعن السياسي المتعافي
أبو جيب غويط لكن دافي
بقي عنده قرية سياحية،
ومصنع مية
دلوقتي قلع الجلابية
وبيستحضر للشوري
وفي عز شهر الصوم ح نقول:
فوازير كتير شرحها ح يطول
وح نفتح الباب المقفول
ونلف بيكم نص الكون
وح نحكي عن الظلم الحاصل
وعن النضال المتواصل
عن مخلصين كده زيينا
وعن القلوب المكسورة
وعن النفوس المسحورة
فزورة، بعدها فزورة
تتحل طبعًا بسهولة
بس أنت اكتب عنوانك
وابعتلي حل الفزورة