«بدر» لطلاب الفيوم: «الدولة متقدرش تجيب كل حاجة» والشيحى: «احلف على مصحف إن التعليم فى مصر كويس»

قال الدكتور أحمد زكى بدر وزير التنمية المحلية، إن فترة الجامعة بالنسبة للطلاب هى أفضل فترات حياتهم على الإطلاق، مشيرًا إلى أن الحياة بعد التخرج من الجامعة مليئة بالعمل والضغوط والمسئوليات المتراكمة.
وأضاف بدر: «بعد التخرج هتشوفوا مجهود تربية الأولاد، وهتفتكروا الأيام الجميلة بتاعت الدراسة والإجازة، والطالب لا بد أن يعيش حياته بكل ما تحمل تلك الكلمة من معنى، من دراسة ورحلات وترفيه وحفلات والفن الهادف النظيف مش بس دراسة، والامتحانات استمتعوا بيها جدا مجرد التخرج كل اللى فات هيروح وتبدأ حياة العمل والشغل والجد.
وتابع وزير التنمية المحلية، قائلا: «الطالب لازم يذاكر ويجتهد والمحاضرات والسكاشن مع الرياضة والحفلات والرحلات والثقافة، شخصيتكم تبنى فى المدرسة والجامعة هتلاقى الوقت قل بعد التخرج لازم تستفيدوا من حياة الجامعة بالثقافة والفن الراق الهادف النضيف خليكوا طلبة بمعنى الكلمة ليس فقط كتاب ومذاكرة».
واستطرد: «كلنا فى بيوتنا مش بنقدر نشترى كل حاجة محتاجينها، والدولة كمان كده متقدرش تجيب كل حاجة، لكن نقول الحمد لله على النعمة، معندناش إمكانيات وفلوس، فلازم نعوض ده بالشكر والعمل مع الوقت والاجتهاد»، والرضا يجب أن يصحبه العمل لكى نتقدم».
جاء ذلك خلال كلمته لطلاب جامعة الفيوم أثناء زيارته التفقدية لجامعة الفيوم بصحبة الدكتور أشرف الشيحى وزير التعليم العالى والبحث العلمى.
كما افتتح الدكتور أشرف الشيحى وزير التعليم العالى والبحث العلمى خلال الزيارة عددا من المنشآت الجديدة بالجامعة، بجانب افتتاح الملعب الخماسى بالجامعة بعد تطويره، حيث تبلغ المساحة الإجمالية للملعب 1000 متر مربع، ويشمل تراك لألعاب القوى (3 حارات)، وممشى رياضيا، بتكلفة نحو 500 ألف جنيه.
كما تفقد وزير التعليم العالى والتنمية المحلية فرع التأمين الصحى بالجامعة لأعضاء هيئة التدريس والعاملين.
وتفقد الوزيران الأعمال الإنشائية بمجمع الكليات الطبية الذى يشمل كليتى التمريض والصيدلة على مساحة قدرها 5300 متر، بتكلفة إجمالية 112 مليون جنيه . كما تم وضع حجر الأساس لمقبرة توت عنخ آمون بكلية السياحة والفنادق، حيث حصلت كلية السياحة والفنادق بالجامعة على المركز الأول عن هذا المشروع الفيوم.
وأكد وزير التعليم العالى أن التعليم فى مصر كويس، قائلا «هجيب مصحف واحلف عليه علشان نصدق إن التعليم فى مصر كويس، وبلاش نقطع فى نفسنا، مين هيشغل الخريج لو احنا قلنا عليه وحش، بلاش جلد الذات والعنف فى التصدى للمشاكل».
وتابع الشيحى، أن هناك دولا ترسل طلابها يتعلموا فى مصر، قائلا «لو احنا تعليمنا مش كويس مكناش هنلاقى الطلبة دول، وجادين فى حل المشاكل ونعمل عليها، الدنيا مش متوقفة واحنا كل يوم أحسن مش هقول هنستنى 10 سنين لكن قارنوا السنة دى باللى فاتت ستجدون هناك تحسن، والمنظومة لن تصلح فى يوم».