«صرخة الشباب «السيسي» أسقطت نظام ورئيس»

شهداء مصر «بلطجية».. وأحرارها شباب «سيس».. وعسكرها «خونة».. إنها بعض المصطلحات التي يرددها قيادي جماعة الإخوان من أعلي منصة رابعة العدوية وتثير شباب الثوار علي مواقع التواصل الاجتماعي ضد محاولات تشويه صورهم وكانت أبرز التعليقات التهكمية علي تلك الأوصاف:
■ الإخوان بتقول علي الشباب اللي نزلوا يوم 30 شباب سيس مش الشباب السيس دول اللي اسقطوا مبارك في 18 يوم وانت قاعد مستخبي تحت السرير خايف تنزل وبتضحك علي نفسك وتقول الخروج علي الحاكم حرام؟
والشباب السيس دول هما اللي اسقطوا جماعة شغالة بقالها 8 سنة في اقل من اسبوع؟
خليني افكرك بصرخة شاب سيس سقط نظام ورئيس!
■ «سيس» لأننا وقفنا ضد مبارك وجبروته وقت ما هما كانوا بيقولوها بكل صراحه مش نازلين علشان خايفين؟ واللي ماتوا كلهم شباب غير مسيس وبعد ما قتل اللي قتل من خيره شباب مصر قالوا اصل شباب الاخوان نزلوا الثورة ونسبوها ليهم ؟ احنا سيس بس مش هانولي أي حاكم ظالم تاني علينا ويكون رئيس.
وتوالت تعليقات النشطاء التي توضح دفع الجماعة بالشباب في أتون معارك لا يستطيعون إقحام أبنائهم منها علي سبيل المثال:
■ إصابة ابن مهدي عاكف، وابن محمد بديع، وابن صفوت حجازي، وابن محمد البلتاجي، وابن حازم صلاح أبو إسماعيل، وابن محمد مرسي، وابن عصام العريان، وابن خيرت الشاطر، في أحداث الحرس الجمهوري النهاردة، طبعاً فيه واحد إخواني خروف مش مصدق.. بما إنك مش مصدق يعني انت عارف كويس إن أبناء القيادات مش بتنزل معاكوا، وبيصدروكم انتوا عشان يتاجروا بدمكم عبر رداء الدين، برافوا عليك استمر.. خليك خروف زي ما انت لحد ما تتدبح.
■ تنكر أن رئيسك المعزول اخطأ؟
■ تنكر أن رئيسك المعزول حارب القضاء والإعلام والشباب والنخب والجيش والمجتمع كله؟
■ تنكر أن رئيسك المعزول معرفش يكسب عاصري الليمون في صفه وتعمد أقصائهم؟
■ تنكر أن رئيسك المعزول معرفش يحيد الفلول واعدائه من البداية؟
■ تنكر أن رئيسك المعزول كذاب وكذب بدل المرة ألف وخدع الجميع بوعود زائفة؟
■ تنكر أن رئيسك المعزول ملاين المصريين خرجوا ضده كارهين وجوده في الحكم بسبب كل اللي فات ده؟
■ تنكر أن الجيش والفريق السيسي لم يستطع الازاحة برئيسك المعزول إلا في ظل وجود كل ما سبق؟
■ تنكر أو متنكرش مش هتفرق كتير طالما انت عايز تسمع صوت نفسك بس يبقي صدقني عمرنا مهنوصل لنقط اتفاق ونعبر المرحلة دي مع بعض.
آه حاجة اخيرة رئيسك المعزول مينفعش يرجع لمليون سبب والله اصدقك القول، يالا نفكر في بكره لان امبارح مش هيرجع تاني، دي سنة الله في الأرض.