الفلة.. في الفانلة!

عجبي علي ديمقراطية المجلس القومي للرياضة، مؤتمر طويل عريض مصروف عليه الشيء الفلاني هدفه نشر الديمقراطية في الجمعيات العمومية، العنوان : مفيش لا رئيس ولاعضو في مجلس الإدارة أكثر من 8 سنوات، كلام جميل و»متزوق«.. واشواف كلامك يعجنبي واشوف أمورك اتعجب!
نفس المجلس القومي للرياضة الداعي لديمقراطية الأندية وتداول السلطة. نفسه هو المجلس اللي سايب الحبل علي الغارب في اتحاد مصروف عليه ملايين.. قبل 3 سنوات شكل وعين اتحاد اسمه : »الرياضة للجميع« طبعاً التعيين علي الكيف: ايشي من الوزارة زي الدكتور عماد البنان اللي هو هو عضو في اتحادات أخري.. وايشي من الحزب الوطني ناس نازلة بالبارشوت من اللجنة اللي كان اسمها السياسات.. سياسات ايه مش عارف! وايشي ناس واسطة يحضروا اجتماعات ويتصوروا ومفيش ولا واحد منهم يعرف عن نشاط هذا الاتحاد أي حاجة.. بذمتكم مش حاجة جميلة.
المهم: الاتحاد تكونت له جمعية عمومية من أندية في القاهرة والأقاليم وعمل شوية نشاط سبعة أو ثمانية مهرجانات الحقيقة كانت جيدة.. وبعدها: »بخ« لاحس ولاخبر.. المليون جنيه ميزانية السنة دي اتصرفت علي الموظفين ايش بألفين وايشي بثلاثة وايشي بخمسة. مع ان كل الشغل يعمله موظف واحد بألفين جنيه في الشهر.
طبعاً الجمعية العمومية اللي هيه الأندية في الفلاحين وفي الصعيد شايفة الفلوس رايحة جاية امامها ولاتمسك منها إلا الفتات.. معجبهاش كتبت مطالبة بعمل جمعية عمومية لمناقشة أمور اتحادها ومايشوبه من عيب تري فيه فساد تماما زي الحزب الوطني الأندية الطيبة أرسلت نسخة لرئيس المجلس القومي علشان يشوف شغله.. مر أسبوع واثنان وثلاثة وشهر و»ودن من طين واخري من عجين«.
انا شخصياً عارف. المهندس حسن صقر عارف. واتحاد اللعبة عارف. والناس في الأندية عارفة كل حاجة .. ومفيش حد بيتحرك.. نفسي أسأل المهندس صقر: انت »موصلكش« طلبات الأندية لحل مجلس الادارة؟.. انت ساكت ليه؟ مش دي برضه ديمقراطية واندية بتطالب بحقها الديمقراطي.. ولا الديمقراطية علي ناس وناس؟ مادام الأمر كده. يبقي زي ماقلت : الفيل في المنديل.. والفلة في الفانلة..