«تسريب الأذرع الإعلامية» يكشف حقيقة الخلاف بين عزمي مجاهد وتامر عبدالمنعم

كشفت تسريبات جديدة حصلت عليها قناة مكملين مساء اليوم الأربعاء عن حقيقة الخلاف بين مقدمي البرامج عزمي مجاهد وتامر عبدالمنعم.
وقال «عزمي» أثناء حديثه مع ضابط المخابرات النقيب أشرف الخولي: «أنا مدايق من وليد حسني لأنه بيشتغل مع الواد تامر عبدالمنعم، فهو بيزنق عليا جدًا، وبعدين بيقولي إيه اااا قلل من الإنترو، طب مانا الإنترو بعمله للبلد».
وأضاف: «أنا واقف مع البلد مع جيشي ومع شرطتي، ونحمس الشعب وواقفين مع الريس، تامر ما يشتغل بنفس الطريقة إيه المشكلة، هو أنا لما آخد نسبة مشاهدة عالية أو الناس تتفرج عليا أكتر هو ده وحش».
ومنذ مطلع الأسبوع، كشفت صحيفة «نيويورك تايمز» عن تسريبات تخص الضابط المخابرات يتحدّث مع مقدمي برامج وممثلين ويوجههم فيما يقولونه بشأن اعتراف ترامب بالقدس عاصمة ل«إسرائيل» وضرورة رفض القرار على الرغم من الموافقة المصرية.
وأثارت التسريبات حالة من الجدل؛ خاصة مع وجود تحريض على حركة حماس وقطر، وضرورة الحديث عن تجنب دعم الانتفاضة الفلسطينية لأنها تضر بالأمن القومي المصري.
وجاء نص المكالمة كالتالي:
بس أنا أنا بس هقول لحضرتك حاجة، أنا في الشغل مضايق يعني
ليه يا كابتن، حد مضايقك بلغني على طول
لا أنا مش مضايق حسام… اسمه إيه ده وليد حسني
امممم
يعني بيشتغل لصالح الواد تامر عبد المنعم
تامر مفيش قبول يعني أنا ما ب… يعني
امممم
فهو بيزنق عليا جدًا
وبعدين بيقولي إيه اااا قلل من الإنترو
طب مانا الإنترو بعمله للبلد
أنا بعمل الإنترو إيه
الإنترو واقف مع البلد مع جيشي ومع شرطتي
ونحمس الشعب وواقفين مع الريس
امممم
الله.. تامر ما يشتغل بنفس الطريقة إيه المشكلة إيه المشكلة
هو أنا لما آخد نسبة مشاهدة عالية أو الناس تتفرج عليا أكتر هو ده وحش
يعني وبعدين رئيس قناة تقف مع واحد ضد واحد ليه؟ ليه لصالح مين ده؟
أنا متكلمتش على فكرة في الكلام ده
لا إحنا هنكلمهم
بس أنت
لأ إحنا هنكلمهم لأن أنت كابتن
يا كابتن عزمي أنت فعلاً مشاهدتك بتزيد
وبدأت الشعبية تزيد فمش المصلحة دلوقتي إن يحصل خلاف
فإحنا هنكلمهم
وبعدين لا ده إمبارح يا بيه حصل الأجدد بأه
لقيته بيكلمني بيقلي هخليك ساعتين في الأسبوع
تعمل برنامج الحقيقة ومش الحقيقة
قلتله أنا أخد ساعتين في الأسبوع
أنا باخد ست ساعات في الأسبوع اتنين وتلات وأربع
عايز يخليني يومين
واليوم ساعة والحلقتين كل حلقة ساعة
لصالح مين؟
لا ده ب ك…م أمه بأه بيتكلم من دماغه
ما أنا بقول لحضرتك أهو
امممم
أنا رايح النهاردة أقسم بالله ورب الكعبة على أخري
يعني أنا رايح يعني مش هاشوفه
لأ ده مش وقته مش وقت الكلام ده
وبتعرض.. وبتعرض لضغوط وش.. وشتيمة وقلة أدب
وأنت شايف على الفيس بوك وتويتر بيحصل إيه معايا
لا دول إخوان ده ده سيبك منهم دول
ماشي ماشي بس أنا بس أنا شغال بهذا الأسلوب
والناس كلها ورانا ومعانا وبيسمعونا في الأرياف بالذات كمان
صحيح صحيح
يبقى جاي من باب تقولي هديك حلقتين الحلقة ساعة
قلتله.. واقف مع تامر عبد المنعم على عيني وراسي
امممم
بس ده القبول من عند ربنا بأه
لا خد بالك برضه إن تامر برضه له توجه
أنت عارفه توجهه القديم
في جبهة ااا أنت عارف ال ال المخابرات العامة
ما أنا عارف مبارك ومش مبارك وكل يوم مبارك ومش مبارك
آه مليش علاقة
هو لحق نفسه في موضوع شفيق ده خد بالك
لأنه عارف إنه لووو.. آه
يا بيه جالي توجه…..
أنا مقدرش أعمل إلا لما أسأل يا جماعة متوجه في إيه
امممم
لو شفت اللي أنا كاتبه عن اليمن قسمًا عظمًا من اللي أنت قايله
ممتاز يا كابتن عزمي
قسمًا عظمًا بالظبط
امممم
فلو سمحتوا تكلموا الراجل ده
امممم
ويعني يسيبني أشتغل الفترة دي
لما الانتخابات تخلص ياخد القرار زي ما هو عايز
لا إحنا عارفين هنتعامل معاه إزاي
متقلقش يا كابتن عزمي
وأنت طلباتك فوق الراس
لا لأن هو هينفذ الكلام ده النهاردة وعامل اجتماع خد بالك
لالالا ده بيستهبل
هو مش عارف إن الكابتن عزمي بتاعنا
بس اصبر عليا يا كابتن وهتسمع أخبار كويسة
بس حد يكلمه بس النهاردة
يقوله ابعد عن الراجل ده شوية
من عنيا حاضر
حاضر عنيا يا كابتن عزمي
الله يخليك
في أي مشاكل تانية يا كابتن
هي بس القصة دي يبعد عني وملوش دعوة بي
وخليه مع تامر زي ما هو عايز
تمام عنيا حاضر
وهتابع معاك إن شاء الله بعد ما الموضوع ده يتم بإذن الله
تابع معايا الحلقة النهاردة
8.30 إن شاء الله
6.01 – للنهاية
تمام تمام
بس عشان خاطري إدي إدي تليفون للواد ده
الله يباركلك لوليد حسني ده
تمام بس أنا مش بتابع معاه
أنا هخلي بس حد يتابع معاه من الظابط اللي بيتابع معاه كده هكلم
هات يا بني الل….
ماشي يا كابتن أنا بس هقفل معاك
ووو وداخل بس اجتماع دلوقتي وهبلغهم الموضوع ده
ماشي
تسلم يا حبيبي
اتفضل يا باشا اتفضل
متشكرين مع السلامة