نتائج الثانوية العامة بالإسكندرية ما بين الفرحة والشكر

تباينت آراء الطلاب والأهالي بمحافظة الإسكندرية، عن نتيجة الثانوية العامة هذا العام، كما هي الحال في الأعوام الماضية، ما بين فرح وحزن وبكاء.
ويحكي أحد أصحاب مراكز الكمبيوتر بمنطقة سبورتنج، عماد رمضان: "النسبة اللي جت من الطلاب عشان ياخدوا النتيجة مش كبيرة، وده غالبا عشان أغلب الشباب عندهم نت في البيت، أو على التليفون، بس فيه ناس جت لي هنا شكلهم من بره إسكندرية وشغالين هنا في المنطقة، فيهم واحد من كفر الشيخ شكله شغال في المباني، جايب رقم جلوس ابنه عشان اطلع له النتيجة، ابنه جايب مجموع 98.82%، الراجل من فرحته طلع استلف 100 جنيه من واحد زميله كان مستنيه بره وقاللي دي حلاوتك وقعد يعيط".
وأضاف "رمضان"، "فيه طلاب كتير طلعوا النتيجة من عندي النسبة بتاعتهم من 75% ل98%، والحمد لله الناس مبسوطة وفرحانين، ودي بتكون مناسبه كويسة كل سنة الواحد بيسترزق منها، وربنا ينجح كل الطلبة وكل واحد يخش الكلية اللي هو عايزها".
وبسؤال أحد الطلاب المتواجدين عن نتيجته، قال أحمد ربيع: "أنا عندي نت في البيت بس نزلت أجيبها من السيبر عشان محدش يعرف أني جبتها والحمد لله نجحت وجبت مجموع 67%".
وبسؤال أحمد ربيع، عن الكلية التي سينتوي الالتحاق بها، قال: "هقدم كلية زراعة ومعاها هتمرن في جيم كويس، واقدم كلية شرطة بس عايزة واسطة ربنا يكرم ونلاقي واسطة كويسة".
وبسؤال أميرة خميس، عن نتيجتها، قالت: "الحمد لله بفضل دعاء أمي وأبي، ربنا أكرمني وجبت مجموع 92.7% ويا رب ادخل كلية علوم".
فيما قالت والدة الطالبة أميرة: "والله يابني كان نفسنا تجيب مجموع أحسن من كده عشان تدخل كلية، طب بس الحمد لله رب العالمين، وربنا يوفقها هي وكل زمايلها".