آخر كلام

× إيه الخيبة دى؟!
العرب أقاموا الأفراح والليالى الملاح لفوز الحاج أبو حنان على "المعلمة أوسة" على اعتبار إنه "حلال العقد" اللى هايجيب التايهة.. وهايحل كل مشاكل الدنيا..!
وقد تابعت بمنتهى الغيظ والقرف مذيعى ومذيعات القنوات الإخبارية العربية وهم يزفون للعرب، شاكرين مهللين والضحكة فى وشهم فدان، عودة فتى الفتيان وفارس الفرسان على "حماره الأبيض" لقيادة العالم من جديد.. مؤكدين أنه سينهى كل الحروب والأزمات والمجاعات والبلح الأمهات..!
وكان ناقص يقولوا إنه "بيدور الكعوب ويحمر الخدود.. ويجوز البنات زيه زى السكر النبات..!!
آه يا أمة ضحكت من إعلامها الأمم..!
× يا جماعة اهدوا على نفسكم شوية فترامب بتاع الولاية 45 حمادة وترامب بتاع الولاية 47 حمادة تانى خالص..!!
لذلك ياريت لا نغرق أنفسنا فى ثورة آمال وتطلعات وهمية؛ ولننتظر لنرى ماذا يحمل ترامب فى جعبته للمنطقة والعالم.
فكل تجاربنا مع الأمريكان بتؤكد إن البيت الأبيض عمره ما بينفع فى اليوم الأسود..!
× البيض التركى كشف المستور..!
فبعد طرح أول شحنات من البيض التركى فى السوق المصرية انخفضت الأسعار حوالى تلاتين جنيه فى الكرتونة حتة واحدة.
يعنى من الآخر كدا.. البيض التركى"فقس" الاحتكار اللى بيمارسه التجار الفجار اللى هايخشوا جهنم حدف.. منهم لله..!
× بالمناسبة هو جهاز حماية المنافسة ومنع الاحتكار "شغلته" إيه فى البلد بالضبط..؟!
فالمحتكرون طايحين فى السوق.. وبيحتكروا كل شىء وأى شىء من الحديد والأسمنت وحتى الجرجير والمش والجعضيض دون أن يخافوا من أى عقاب أو حساب أو حتى عتاب.. كل ده وجهاز منع الاحتكارات نايم فى سابع نومة..!
واضح إن الجهاز شغلته على المدفع.. بورووروم..!
× برضه وبدون زعل.. هو مجلس النواب.. دوره إيه بالضبط..؟!
فرغم كل ما يشهده السوق من احتكارات وارتفاعات فى أسعار السلع والخدمات من جانب الحكومة والتجار.. إلا أن المجلس ودن من طين وأخرى من عجين وعامل نفسه من بنها..!
× بنفس الفرحة والضحكة اللى فى الوش فدان.. بثت بعض القنوات العربية خبر إقالة النتن ياهو لوزير دفاعه.. وكأن ذلك هو غاية المراد من رب العباد..!
يا جماعة دول كلهم إرهابيين ومجرمى حرب برخصة.. يعنى كلهم نفس الطينة والعجينة..
الفرق الوحيد إن بعضهم بنى برباط والبعض الآخر بنى برضه.. بس من غير رباط.. لامؤاخذة..!